ހުޅުމާލެ މަސްމާރުކޭޓް ހިންގާނެ ބަޔަކު ހޯދަނީ

ހުޅުމާލެ ފޭސް އެކެއްގައި ހުންނަ ވަގުތީ މަސްމާރުކޭޓް ހިންގާނޭ ބަޔަކު ހޯދުމަށް އެޗްޑީސީން އާއްމުކޮށް ހުޅުވާލައިފިއެވެ. އެޗްޑީސީން ބުނީ ހުޅުމާލޭ ވަގުތީ މަސްމާރުކޭޓް ކުއްޔަށް ދޫކުރުމަށް ނިންމާފައިވާ ކަމަށާއި، ޝައުގުވެރިވާ ފަރާތްތަކުން އަންނަ މާރޗްމަހުގެ ތިންވަނަ ދުވަހުގެ 09:30 ފެށިގެން 11:00 އާ ހަމަޔަށް ފޯމް ހުށަހެޅުމަށް ހުޅުވާލާފައިވާކަމަށެވެ. އެޗްޑީސީގެ އެގްޒިބިޝަން ސެންޓަރުން ފޯމް ބަލައިގަތުމުގެ ކަންކަން ކުރިއަށްފާއިރު، ގުރުއަތު ނެގުން ބޭއްވުމަށް ހަމަޖެހިފައިވަނީ އެދުވަހުގެ 11:30 ގައެވެ. ހުޅުމާލެ ވަގުތީ މަސްމާރުކޭޓުގެ ބޮޑުމިނަކީ 221 އަކަމީޓަރެވެ. މި މަސްމާރުކޭޓުގައި މަސް ބެހެއްޓުމަށް 6 އަށީގެ އިތުރަށް މަސް ކެނޑުމަށް ހާއްސަކޮށް 6 އަށި ހުރެއެވެ. މަސްމާރުކޭޓް 1 އަހަރު ދުވަހުގެ ނިޔަލަށް ދޫކުރުމަށް ހަމަޖެހިފައިވާއިރު، ކުލީގެ ގޮތުގައި ދައްކަންޖެހެނީ މަހަކަށް 6،000 ރުފިޔާއެވެ. މަސްމާރުކޭޓް ހިންގާ ފަރާތުން ލީސް ޑިޕޮސިޓްގެ ގޮތުގައި 18،000 ރުފިޔާ ބަހައްޓަން ޖެހޭއިރު، މި ފައިސާ ދައްކަންޖެހެނީ އެތަން ލިބޭތާ 5 ދުވަހުގެ ތެރޭގައެވެ. މަސްމާރުކޭޓް ހިންގުމުގެ ފުރުސަތު ދިނުމަށް ހަމަޖެހިފައިވަނީ ހަމައެކަނި ދިވެހި ކުންފުނިތަކަށެވެ.