ބީއެމްއެލްގެ ހިއްސާދާރުންނަށް ހިއްސާގެ ފައިދާގެ ގޮތުގައި ރެކޯޑް އަދަދެއް ބަހަނީ

ދިވެހި ޤައުމީ ބޭންކް، ބޭންކް އޮފް މޯލްޑިވްސްއަށް މިދިޔަ އަހަރު ސާފްފައިދާގެ ގޮތުގައި 2.07 ބިލިއަން ރުފިޔާ ލިބިއްޖެއެވެ. މިދިޔަ އަހަރު ބީއެމްއެލްގެ ވިޔަފާރިއާ ގުޅޭގޮތުން އެ ބޭންކުން ބުނީ ޓެކްސްއަށް ކެނޑުމަށްފަހު ރެކޯޑް އަދަދެއްކަމަށްވާ، 2.07 ބިލިއަން ރުފިޔާ، ފައިދާގެ ގޮތުގައި ރެކޯޑް ކުރެވިފައިވާކަމަށެވެ. ބީއެމްއެލްއިން ވަނީ ކުރިއަށްއޮތް އަހަރީ އާއްމު ޖަލްސާގައި ހިއްސާދާރުންނަށް ފައިދާގެ ގޮތުގައި ހިއްސާއަކަށް 50 ރުފިޔާ ބެހުމަށް ނިންމާފައެވެ. އެއާއެކު ޖުމްލަ 269 މިލިއަން ރުފިޔާ ހިއްސާދާރުންނަށް ބަހާނެއެވެ. ބީއެމްއެލްގެ ބޯޑުން ހިއްސާއަކަށް 50 ރުފިޔާ ބެހުމަށް ނިންމި ނަމަވެސް އެ އަދަދު ފާށްކުރާނީ އަހަރީ އާއްމު ޖަލްސާގައި ހިއްސާދާރުންގެ ވޯޓުންނެވެ. މިކަމާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ ކާރލް ސްޓުމުކަ ވިދާޅުވީ މިއީ ބީއެމްއެލްގެ ތާރީހުގައިވެސް 2 ބިލިއަން ރުފިޔާއަށް ވުރެ މަތީ އަދަދެއް ފައިދާގެ ގޮތުގައި ލިބުނު ފުރަތަމަ ފަހަރު ކަމަށެވެ. އަދި މިފަހަރު ވެގެންދާނީ ބޭންކުގެ ތާރީހުގައިވެސް ހިއްސާދާރުންނަށް އެންމެ ގިނައިން ހިއްސާގެ ފައިދާ ދޫކުރާ ފަހަރު ކަމަށްވެސް ސްޓުމުކަ ފާހަގަ ކުރެއްވިއެވެ. https://twitter.com/bankofmaldives/status/1775801473030553606 ބީއެމްއެލްއަށް މިދިޔަ އަހަރު މާލީގޮތުން ލިބުނު ފައިދާއާ އެކު ދިވެހި ސަރުކާރަށް ހިއްސާގެ ފައިދާގެ ގޮތުގައި 136.6 މިލިއަން ރުފިޔާގެ އިތުރުން މިދިޔަ އަހަރު ޓެކުހުގެ ގޮތުގައި 628 މިލިއަން ރުފިޔާ ލިބޭނެއެވެ.