ބާޒާރުގައި މޭވާގެ އަގުތައް ވަރަށް ބޮޑުވެއްޖެ

މާލޭ ބާޒާރުގައި މޭވާގެ ބާވަތްތަކުގެ އަގުތައް ވަރަށްބޮޑަށް އުފުލިއްޖެއެވެ. ބާޒާރުގެ އަގުތަކަށް ބަލާއިރު، މިދިޔަހަފްތާ ނިމިގެންދިޔައިރު، މޭވާގެ ބާވަތްތަކުގެ ތެރެއިން އަގުތަކަށް އެންމެބޮޑު ބަދަލެއް އައިސްފައިވަނީ އާފަލާއި، އޮރެންޖު އަދި ޖުމްހޫރީ މޭވާގެ އަގުތަކަށެވެ. ބާޒާރުގައި ފެލި އާފަލެއްގެ އަގު ބާރަ ރުފިޔާއަށް މައްޗަށްގޮސްފައިވާއިރު، އެންމެ އަގުހެޔޮކޮށްވެސް ގިނަ ތަންތަނުން ފެހި އާފަލެއް މިހާރު ލިބެންހުރީ 9 ރުފިޔާއަށްވުރެ ބޮޑުކޮށެވެ. ރާއްޖެއަށް މޭވާގެ ބާވަތްތައް އެތެރެކޮށް އަދި ހޯލްސޭލްކޮށް ވިއްކަމުންދާ އުފަންވެލި ޝޮޕުންވެސް ފެހި އާފަލެއް މިހާރު ލިބެންހުރީ 9.50 ރުފިޔާއަށެވެ. ރޯދަމަހު އާއްމުގޮތެއްގައި ޑިމާންޑް ބޮޑުވެ އަގުތައް މައްޗަށްދާކަމަށް ފާހަގަކުރެވެނީ ފަނިގިރުމަށް ބޭނުންކުރާ ތަކެތި ނަމަވެސް، އާފަލަކީ ދިވެހިން އެންމެ އާއްމުކޮށް އަބަދުވެސް ބޭނުންކުރަމުން އަންނަ މޭވާއެކެވެ. އާފަލުގެ އިތުރުން ފަނިގިރުމަށް އެންމެގިނައިން ބޭނުންކުރަމުން އަންނަ އޮރެންޖުގެ އަގުވެސް ވަނީ 9 ރުފިޔާއަށް އުފުލިފައެވެ. ހޯލްސޭލްކުރާ ބައެއް ފިހާރަތަކުން އޮރެންޖެއް 8 ރުފިޔާއަށް ލިބުނު ނަމަވެސް ބާޒާރުމަތީގެ ގިނަ ފިހާރަތަކުން އޮރެންޖު ލިބެންހުރީ އެއަށްވުރެވެސް އަގުބޮޑުކޮށެވެ. އޮރެންޖުގެ އިތުރުން މިހާރު ބާޒާރުގައި އެންމެބޮޑަށް އަގުއުފުލިފައިވަނީ ޖުމްހޫރީ މޭވާ އާއި ކުރުނބާގެ އަގެވެ. ޖުމްހޫރީ މޭވާ ނުވަތަ ޕެޝަންފުރުޓް ކިލޯއެއްގެ އަގު 150 ރުފިޔާއަށް އުފުލިފައިވާއިރު، ފުރުޓް ހިމެނެނީ މިހާރު ބާޒާރުގައި އެންމެމަފު އެއްޗެހީގެ ތެރޭގައެވެ. ދަތުރުވެރިންގެ މާރުކޭޓުގައި ކުރުނބާގެ އަގުތައް އަދިވެސް ހުރީ 35 ރުފިޔާއިން މަތީގައެވެ. ބާޒާރުގައި އަގުތައް އެއްވަރެއްގައި ހިފެހެއްޓިފައިވާ އެކެއްޗަކީ ކަރައެވެ. ރާއްޖޭގެ ދަނޑުތަކުން ގެންނަ ކަރާ ކިލޯއެއް އެންމެ ބޮޑުވެގެންވެސް 18 ރުފިޔާއަށް ލިބޭއިރު، އިންޑިއާ ކަރާ ކިލޯއެއް 15 ރުފިޔާއަށް ލިބެން އެބަހުއްޓެވެ. ދަތުރުވެރިންގެ މާރުކޭޓުގައި ކަރާ ވިއްކާ މީހުން ބުނާގޮތުގައި އިންޑިއާއިން ކަރާ ނުގެންނަ ނަމަ ދިވެހި ދަނޑުތަކުން ވިއްކާ ކަރާ ކިލޯއެއްގެ އަގު 25 ރުފިޔާއަށް އަރައިގެން ދިއުމުގެ ފުރުސަތު ވަރަށް ބޮޑެވެ.