ތިން އަހަރުގެ މެދުކެނޑުމަކަށްފަހު ހޮންކޮން އެއާލައިން ރާއްޖެއަށް

ތިން އަހަރުދުވަހުގެ މެދުކެނޑުމަކަށްފަހު ހޮންކޮން އެއާލައިނުގެ ދަތުރުތައް ރާއްޖެއަށް ފަށައިފިއެވެ. ހޮންކޮން އެއާލައިނުން އަލުން ރާއްޖެއަށް ދަތުރުތައް ފަށާފައިވާއިރު، މިދަތުރުގެ ފުރަތަމަ ފްލައިޓް ވެލާނާ އިްނޓަރނޭޝަނަލް އެއާޕޯޓަށް ޖައްސާފައިވަނީ މިރޭގެ ވަގުތެއްގައެވެ. މިރޭ އައި ހޮންކޮން އެއާލައިނަށް މަރުހަބާ ކިޔުމުގެ ގޮތުން ވީއައިއޭގައި ވަނީ ހާއްސަ ހަރަކާތެއް ކުރިއަށްގެންގޮސްފައެވެ. މިކަމުގައި ވީއައިއޭ ހިންގާ އެމްއޭސީއެލްގެ އިތުރުން ޓޫރިޒަމް މިނިސްޓްރީ އާއި ޓޫރިޒަމް ސިނާއަތުގައި ހަރަކާތްތެރިވާ ބައެއް ފަރާތްތަކުން ބައިވެރިވިއެވެ. ހޮންކޮން އެއާލައިނުން މީގެ ކުރިންވެސް ރާއްޖެއަށް ދަތުރުތައް ކޮށްފައިވާއިރު، އެންމެފަހުން ދަތުރުތައް ހުއްޓާލާފައިވަނީ ކޮވިޑް ބަލިމަޑުކަމާ ގުޅިގެންނެވެ. ހޮންކޮން އެއާލައިނުން ޝެޑިއުލް ދަތުރުތައް އަލުން ފަށާފައިވާއިރު، އެ އެއާލައިނުން ހަފްތާއަކު ތިން ދުވަހު ރާއްޖެއަށް އުދުހުންތައް ބޭއްވުމަށް ވަނީ ނިންމާފައެވެ. މި ދަތުރުތަކުގައި އެއާބަސް އޭ 380 މަރުކާގެ ބޯޓު ބޭނުންކުރާއިރު، އެ އެއާލައިނުން މިއަދު ވަނީ 209 މީހުން ވަނީ ރާއްޖެ އައިސްފައެވެ. https://twitter.com/visitmaldives/status/1748384735771169254 ބައިނަލްއަޤްވާމީ އެކި ކަންކޮޅުތަކުގައި މަންޒިލެއްގެ ގޮތުގައި ރާއްޖޭގެ ފަތުރުވެރިކަން އިސްތިހާރުކުރަމުން އަންނަ މޯލްޑިވްސް މާކެޓިން ޕީއާރު ކޯޕަރޭޝަން (އެމްއެމްޕީއާރުސީން) ބުނީ ހޮންކޮން އެއާލައިނުގެ ދަތުރުތައް ރާއްޖެއަށް ފެށުމުގެ ސަބަބުން ޗައިނާ ސަރަހައްދުން ރާއްޖެ އަންނަ ފަތުރުވެރިންގެ އަދަދު ވަރަށްބޮޑުތަން އިތުރުވާނޭ ކަމަށެވެ. ރާއްޖެއަށް މިހާރުވެސް ޗައިނާގެ ހަތަރު އެއާލައިނަކުން އުދުހުންތައް ބާއްވައެވެ.