ދިވެހި ރާއްޖޭގެ ވެރިކަމުގަ ހުންނަ މީހާއަކީ މާބޮޑު ވަލިއްޔުލްއަމްރެއްގެ ގޮތުގަ ދެކޭދެކުން ބަދަލުކޮށް ރާއްޖޭގެ ވެރިކަމުގަ ހުންނަ މީހާއަކީ ދައުލަތާއި ރައްޔިތުންގެ ހާދިމެއްކަމަށް ދިވެހި ރައްޔިތުން ވިސްނުން ވިބަދަލުކުރަންޖެހޭކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
މޯލްޑިވިއަން ޑިމޮކްރެޓިކްޕާޓީ (އެމްޑީޕީ)ގެ ކޮންގްރެސް ނިންމުމުގެ ރަސްމިއްޔާތުގައި ވާހަކަދައްކަވަމުން ފައްޔާޒް ވިދާޅުވީ ދިވެހިރާއްޖޭގެ ވެރިކަމުގައި ތިބޭ ފަރާތްތަކަކީ ދިވެހިންގެ ކަންކަމަށް ހައްލު ހޯދައިދޭން ތިބޭ ބައެއް ކަން ދިވެހިންނަށް ވިސްނައިދިނީ އެމްޑީޕީ އިން ކަމަށެވެ.
އަދި ވެރިންނަށް ރައްޔިތުން އަޅުދާސްތުވާން ނުޖެހޭނެ ކަމާއި, ވެރިން އަޅުދާސްތުވާންޖެހީ ރައްޔިތުންނަށް ކަމާއި, އެ ފިކުރިއްޔާތު ގެނައީ އެމްޑީޕީ އިން ކަމަށާއި، މީގެ އިތުރުން މިގައުމުގެ މުއްސަނދި ކަމަކީ ދެތިން މީހެއްގެ އަތުގައި އޮންނަންޖެހޭ އެއްޗެއް ނޫންކަމާއި, ދިވެހި އެންމެހާ ރައްޔިތުންނަށްވެސް މި ގައުމުގެ މުއްސަނދިކަމުގެ މަންފާ ލިބެންޖެހޭނެކަން ރައްޔިތުންނަށް ވިސަނައިދިނީ އެމްޑީޕީ އިން ކަމަށެވެ.
ނަމަވެސް ރާއްޖޭގެ ވެރިކަމުގައި ތިބޭ ފަރާތްތަކުން މިވަނީ އެކަންކަން އެހެންގޮތަކަށް ރައްޔިތުންނަށް ވިސަނައިދޭން ފަށާފައިވާ ކަމަށާއި، އެގޮތުން ވެރިންނަކީ މާ މާތް ބައެއްގެ ގޮތުގައި ރައްޔިތުންނަށް ވިސްނައިދޭން މިހާރު ފަށާފައިވާކަމަށްވިދާޅުވެ ފައްޔާޒް ވިދާޅުވީ މި ކަން މިހެންވަނީ ނިޒާމުގެ މައްސަލައަކުން ނޫން ކަމަށެވެ.
އަދި އެކަންކަން އެހެން ދިމާވަނީ ވެރިކަމުގައި ތިބޭ ފަރާތްތަކުން އެކަން އެގޮތަށް ރައްޔިތުންނަށް ވިސަނައިދިނުމުންކަމަށާއި، ނަމަވެސް ދިވެހިރާއްޖޭގެ ވެރިއަކަށް ހުންނަ މީހާއަކީ މާވަރުގަދަ ސަހުސިއްޔަތެއްކަމަށް ދެކޭ ދެކުން ބަދަލުކުރަންޖެހޭ ކަމަށް ފައްޔާޒް ވިދާޅުވިއެވެ.
"މާބޮޑު ވަލީޔުލްއަމްރު އެކޭ މި ކިޔާކިޔުން ބަދަލުކުރަންޖެހޭ, އަޅުގަނޑުމެން ކިޔަންވީ ވަލިއްޔުލްއަމްރުއެކޭ ނޫން, އަޅުގަނޑުމެންކިޔަންވީ ހާދިމުލްއުންމައް, ދިވެހި ދައުލަތުގެ ހާދިމެއްގެ ވާހަކަ އަޅުގަނޑުމެން މިދައްކަނީ, ދިވެހި ރައްޔިތުންނަށް ހަދިމުކަންކުރަން އަންނަ މީހެއް ދިވެހިރާއްޖޭގެ ވެރިކަމާ ހަވާލުވާންޖެވާނީ, މާވަރުގަދަ ބޮޑުސަހުސިއްޔަތެއް އޮތް މީހެއް ނޫން އެމީހަކީ, އަޅުގަނޑުމެންގެ ހުރިހަކަމެއް ގޯސްވާންފަށާހިސާބަކީ އެ ވެރިމީހާއަށް އަޅުގަނޑުމެން އެންމެން ކުރުނީސްކޮށް އޭނާ މާބޮޑު މީހަކަށް ހަދަންފަށާ ހިސާބު އަޅުގަނޑުމެންގެ ސިކުނޑިތަކލުން އެވިސްނުން ނައްތާލަން އެބަޖެހޭ"، ފައްޔާޒް ވިދާޅުވި އެވެ.
މީގެ އިތުރުން ފައްޔާޒް ވިދާޅުވީރާއްޖޭގެ ވެރިންގެ ނޭންގާނީކަމާއި އިސްރާފު މިހާރުވަނީ ހައްދުފަހަނައަޅާފައި ކަމަށާއި، އެމްޑީޕީން މުޒާހިރާކޮށް އެތަށް ގުރުބާނީއެއް ވެގެން މިރާއްޖެއަށް ގެނައި 3 ބާރު ވަކިވެފައިވާ ނިޒާމް މިވަނީ ހަލާކުކޮށް ތަޅުލައި ތިންބާރު އެއްބާރަށް ހަދައިފަ ކަމަށެވެ.
އެހެންކަމުން މިކަންކަން މިހެންވާން މިޖެހޭ ސަބަބާއި މެދު ދިވެހިން ވިސްނަންޖެހޭކަމަށާއި އެމްޑީޕީ ވެރިކަން ބަދަލުވާ ކޮންމެ ފަހަރަކު ރާއްޖޭގެ ރައްޔިތުން މިކަންކަމާ ކުރިމަތިލާންޖެހޭ ޖެހުން ނިމުމަކަށް ގެނައުމަށްޓަކއި ނިޒާމަށް ބޮޑެތި ބަދަލުތަކެއް ގެންނަށް ފައްޔާޒުވަނީ ހުށަހަޅައި އެ ހުށަހެޅުން އެ ޕާޓީގެ ކޮންގްރެސް އިންފާސްކޮސަފއި ކަމަށްވެސް ފައްޔާޒް ވިދާޅުވި އެވެ.
