ދައުލަތުން ކުއްޔަށް ދޫކުރާ ރަށްތަކުގަ ރިސޯޓު ހަދައިފަ ލިބޭ އާމްދަނީއަކި ރިސޯޓު އޯނަރުގެ އަމިއްލަ މިލްކެކޭ ނުބުނެވޭނެކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އަބްދުﷲ ރިފާއު (ބޮޗޭ) ވިދާޅުވެއްޖެއެވެ.
މެންބަރިު ރިފާއު ވިދާޅުވީ ރިސޯޓުތަކުން ލިބޭ އާމްދަނީ އަކީ އަމިއްލަ މިލްކެއް ކަމަށާއި އެ ފައިސާ ބޭނުން ތަނެއްގައި ބެހެއްޓޭނެކަމަށް ބުނެ ރިސޯޓުތަކުގެ ބައެއް ވެރިން ވެރިން އަންނަނީ ވާހަކަދައްކަމުން ކަމަށެވެ.
ނަމަވެސް އެ މީހުންގެ ވިޔަފާރިތައް ބިނާކޮށްފައިވަނީ ދައުލަތުން ކުއްޔަށް ދޫކޮށްފައިވާ ރަށްތަކުގައި ކަމަށްވާތީ އެއީ އެމީހުންގެ އަމިއްލަ ފައިސާއަށް ވާނެ ގޮތަކާމެދު ސުވާލު އުފައްދޭ ކަމަށެވެ.
މީގެ އިތުރުން މެންބަރު ރިފާއު ވިދާޅުވީ ދިވެހިރާއްޖޭގެ އިގްތިސާދު ބަލިކަށިވާ އެންމެ ބޮޑު ސަބަބަކީވެސް ގައުމުގެ ވަސީލަތްތަކުން އުފައްދާ ފައިސާ ގައުމުގައި ނުހުންނަ މައްސަލަ ކަމަށެވެ.އަދި މެމްބަރު ވިދާޅުވީ ސަރުކާރެއްގެ މަސްއޫލިއްޔަތަކީ ވިޔަފާރިވެރިންގެ ފައިދާ ހިމާޔަތްކުރުމެއް ނޫންކަމަށާއި އެހެންނަމަވެސް ސަރުކާރުގެ ޒިންމާއަކީ ރައްޔިތުންގެ މަސްލަހަތާއި ފުދުންތެރިކަން ކަށަވަރުކޮށްދިނުންކަމަށްވެސް މެންބަރު ރިފާއު ވިދާޅުވި އެވެ.
އެގޮތުން ބޭރު ފައިސާ އާއިބެހޭ ޤާނޫނަށް ގެނެވުނު އިސްލާހާއެކު ބަރާއްޖޭގެ އިގްތިސާދު ވަރުގަދަވާނެކަމަށާއި ވަރުގަދަ އިގްތިސާދެއްގެ މާނައަކީ ރަނގަޅު އާމްދަނީއާއި، އުފާވެރި ދިރިއުޅުމަކާއި، ކޮންމެ ދިވެހި އާއިލާއަކަށް ލިބޭ ހަގީގީ ރައްކާތެރިކަމުގެ ގޮތުގައި މެމްބަރު ރިފައު ވަނީ ސިފަކުރައްވާފައެވެ.
މާފަންނު އުތުރު ދާއިރާގެ މެންބަރު ރިފާއު ވިދާޅުވީ ބޭރު ފައިސާ އާއިބެހޭ ގާނޫނަށް ގެނެވުނު އިސްލާހާގުޅިގެން ރިސޯޓު މުވައްޒަފުންނަށް ލިބޭނެ އެއްވެސް އުނިކަމެއް ނެތްކަމަށާއި އެމީހުންގެ މުސާރައިން އެންމެ ރުފިޔާއެއްވެސް އަދި ވަޒީފާއެއް ވެސް ގެއްލިގެން ނުދާނެކަމަށާއި، އެހެންކަމުން މީހަކު ބުނާ އެއްޗެއް އަޑުއެހުމުގެ ބަދަލުގައި އަމިއްލަޔަށް އެ އިސްލާހާ މެދު ވިސްނުމަށްވެސް ރިސޯޓުތަކުގެ މުވައްޒަފުންނަށް މެންބަރު ރިފާއުވަނީ ގޮވާލައްވާފައެވެ.
