މެސީއަށް ކާޑު ނުދެއްކީ ޖާޒީ ދޭން ބުނީމަ ކަމަށް ރެފްރީއަކު ބުނެފި

2007 ވަނަ އަހަރުގެ ކޮޕަރ އެމެރިކާ ގެ ސެމީ ފައިނަލްގައި މެސީއަށް ކާޑު ނުދެއްކީ ޖާޒީ ދޭން ބުނީމަ ކަމަށް އެ މެޗްގެ ރެފްރީ ކާލޯސް ޗަންޑިއާ  ބުނެފިއެވެ. ރެފްރީ ކާލޯސް ޗަންޑިއާ ބުނީ 2007 ވަނަ އަހަރު ވެނަޒުއޭލާގައި ކުރިއަށް ދިއަ ކޮޕާ އެމެރިކާ ގެ ސެމީ ފައިނަލް މެޗްގައި މެސީ އަތުން ބޯޅާގައި ޖެހުމުން އޭނާ އަށް ކާޑު ނުދެއްކީ މެޗަށްފަހު މެސީގެ ޖާޒީ ދޭން އެއްބަސްވުމުން ކަމަށާއި 3-0 އިން މެކްސިކޯގެ މައްޗަށް އާޖެންޓީނާ މޮޅުވެފައިވާ އެ މެޗްގައި މެސީއަށް ކާޑު ދެއްކިނަމަ މެސީއަށް ބުރެޒިލާއެކު ފައިނަލް މެޗުގައި ކުޅުމުގެ ފުރުސަތު ނުލިބުނީސް ކަމަށެވެ. ޗަންޑިއާ ބުނީ އެހެންކަމުން ދަނޑިވަޅުގެ ބޭނުން ހިފައި މެސީއާއެކު އެއްބަސްވުމަކަށް އައީކަމަށެވެ. އީއެސްޕީއެން ފްޓްބޯލް ޝޯ ގައި ވާހަކަ ދައްކަމުން ކުރީގެ ރެފްރީ ބުނީ ސެމީފައިނަލްގެ އެ މެޗްގައި  މެސީ ބޯޅާގައި އަތުން ޖެހުމުން ރީނދޫކާޑެއް ދައްކަންޖެހޭ ކަމަށް މެސީގާތު ބުނި ކަމަށާއި ނަމަވެސް ކާޑުގެ ބަދަލުގައި ޖާޒީ ދެނިކޮށް ކާޑު ނުދައްކާނެ ކަމަށް ބުނުމުން މެސީ އެކަމަށް އެއްބަސްވި ކަމަށާއި އެހެންވެ އެ މެޗްގައި ކާޑު ނުދައްކާ ކަމަށެވެ.

"ބާކީ އޮތީ ދޮޅު މިނެޓު، ސްކޯ އޮތީ 3-0 އިން އޭނާއަށް ރީނދޫ ކާޑު ދެއްކުމުން ކޮޕާ އެމެރިކާގެ ފައިނަލުގައި ކުޅުމުގެ ފުރުސަތު ގެއްލޭނެ" ޗަންޑިއާ ބުނެފައިވެއެވެ.

ޗަންޑިއާ ބުނީ އެ ނިންމުމުގެ ސަބަބުން ކޮޕާ އެމެރިކާގެ ފައިނަލް ބެލެހެއްޓުމަށް އޭނާ ނުހޮވުނު ކަމަށާއި، ނަމަވެސް މެސީ އޭނާގެ އެއްބަސްވުމާ އެއްގޮތަށް މެޗަށްފަހު ޖާޒީ ދިން ކަމަށެވެ.

"މެޗް ނިމުމާއެކު ދަނޑުމަތީގައި މެސީ ޖާޒީ ދޭން އުޅުމުން، އަހަރެން އެކަން މަނާކުރިން، އަހަރެން ބުނިން ޑްރެސިންގ ރޫމަށް އައިސް ޖާޒީ ހަވާލުކުރާށޭ، އެހެންވެ މެސީ ޑްރެސިންގ ރޫމަށް އައިސް ޖާޒީ ހަވާލުކުރީ" ޗަންޑިއާ ބުނެފައިވެއެވެ.

ޗަންޑިއާ ބުނެފައިވަނީ އޭނާގެ ދަރިފުޅުގެ އަތުގައި މިހާރު އެ ޖާޒީ އޮންނާނެ ކަމަށެވެ. ދާދިފަހުން ޓީއެންޓީ ޗިލީއަށް ދިން އިންޓަވިއުއެއްގައި ޗަންޑިއާ ބުނީ ނަންބަރު ހަނދާން ނެތަސް ވަސް ހަނދާން އެބަހުރި ކަމަށެވެ. އަދި އެ ނިންމުން އެންމެ ރަނގަޅެއް ނޫންކަމަށާއި އޭނާ ދެކޭ ގޮތުގައި މެސީއަށް ރީނދޫ ކާޑު ނުދެއްކުމުން ބްރެޒިލް މީހުން މައްސަލަ ޖެއްސިކަމަށާއި އެކަމުގެ ސަބަބުން ކޮޕާ އެމެރިކާގެ ފައިނަލުގެ މެއިން ރެފްރީކަން އޭނާއަށް ނުލިބުނު ކަމަށެވެ.