މިސްކިތުގެ ހުރުމަތް ކަނޑައި ކުޅިވަރު ކުޅުނު މައްސަލަ ބަލަން ފަށައިފި

މިސްކިތެއްގެި ތެރޭގައި ބިދޭސީން ތަކަކާއެކު ކުޅިވަރު މުބާރާތްތަކެއް ބާއްވާ މަންޒަރުފެންނަ ވީޑިއޯއެއް މީސްމީޑިއާގައި ދައުރުވާން ފެށުމާއެކު އެ މައްސަލަ ބަލަން ފަށާފައިވާކަމަށް އިސްލާމިކް މިނިސްޓަރ ޑރ.ޝަހީމް އަލީސައިދު ބުނެފިއެވެ. ދައުރުވަމުންދާ ވީޑިއޯއިން ފެންނަގޮތުގައި ރާއްޖޭގެ ރަށެއްގެ މުވައްސަސާ ތަކެއްގައި މަސައްކަތްކުރާ ސަރުކާރު މުވައްޒަފުންނާއި އެރަށުގައި މަސައްކަތްކުރާ ބިދޭސީ ޓީޗަރުން ނުވަތަ ނަރުހުންވެސް ބައިވެރިކޮށްގެން މިސްކިތެެއްގެ ތެެރޭގައި ކުޅިވަރުތަކެއް ކުޅޭ މަންޒަރު ފެނެއެވެ. އެހެންކަމުން އެ ވީޑިއޯއާއި ގުޅިގެން އިސްލާމިކް މިނިސްޓަރ އެ މަނިކްފާނުގެ އެކްސް އެކައުންޓުން ކުރައްވާފައިވާ ޕޯސްޓެއްގައި ވިދާޅުވެފައިވަނީ މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ޤަދަރާއި އިޙުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަވަނީ ސަމާލުކަމަށް އައިސްފައޮ ކަމަށާއި އަދި އެއީ ކިހިނެއް ހިގާފައިވާ ކަމެއްތޯ ބެލުމުގެ ކަންކަން މިނިސްޓްރީ އިން ވަނީ ފަށާފައި ކަމަށެވެ. އެއަށްފަހު މިނިސްޓަރ ޝަހީމް ވަނީ މިސްކިތްތަކުގެ ޙުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ޙިމާޔަތްކުރުމުގެ ޤާނޫނާއި ޤަވާޢިދުގެ ދަށުން ފިޔަވަޅު އަޅާނެކަމަށްވެސް ވިދާޅުވެ އިތުރު ޕޯސްޓެއް ކުރައްވާފައެވެ.

މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ޤަދަރާއި އިޙުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަވަނީ ސަމާލުކަމަށް އައިސްފަ. މިއީ ކިހިނެއް ހިގާފައިވާ ކަމެއްތޯ ބެލުމުގެ ކަންކަން މިނިސްޓްރީ އިން ވަނީ ފަށާފަ. މިސްކިތްތަކުގެ ޙުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ޙިމާޔަތްކުރުމުގެ ޤާނޫނާއި ޤަވާޢިދުގެ ދަށުން ފިޔަވަޅު އަޅާނަން. އިންޝާ ﷲ" ޑރ.ޝަހީމް ގެ ޕޯސްޓްގައި ލިޔުއްވާފައިވެއެވެ.