ގައުމީ ޔުނިވަރސިޓީގެ ދަރިވަރުންގެ ޔޫނިއަން އާއި އިސްލާމިކް މިނިސްޓްރީން ގުޅިގެން ބާއްވާ "ފަލަސްތީނު ފޯރަމް' ގެ ދެވަނަ އެޑިޝަން ރޭ އައްޑޫގައި ބާއްވައިފި އެވެ.
ހިތަދޫގައި ހުންނަ އައްޑޫ ހައި ސްކޫލްގައި ބޭއްވި އެ ފޯރަމްގައި އައްޑޫސިޓީގެ ސްކޫލްތަކުގެ ދަރިވަރުންނާއި، އައްޑޫގައި ހުންނަ ކޮލެޖް ޔުނިވަސިޓީތަކުގެ ދަރިވަރުންނާއި ޢާންމުން ބައިވެރިވެފައިވެ އެވެ.
ޕެނަލިސްޓުންގެ ގޮތުގައި ޝައިޚް މުޙައްމަދު އަނީލް އާއި އަޙުމަދު ނާޒިހް ބައިވެރިވި އެ ފޯރަމް ގެ މައުލޫއަކީ ފަލަސްޠީނުގެ ތާރީޚާއި، ފަލަސްޠީނުގެ އަދުގެ ޙާލަތު އަދި ފަލަސްޠީނުގެ ޙައްޤުގައި ވަކާލާތުކުރުން އެވެ. އެ ފޯރަމް ގައި ވަނީ ބައިވެރިންގެ ފަރާތުން ހުށަހެޅި ސުވާލުތަކަށް ޖަވާބު ދިނުމުގެ ގޮތުން ޕެނަލް ޑިސްކަޝަނެއް ވެސް ކުރިއަށް ގެންގޮސްފައެވެ.
ފަލަސްޠީނު ފޯރަމަކީ ޢިލްމީ ނަޒަރިއްޔާތަކުން ފަލަސްޠީނުގެ ވާހަކަ ގެނެސްދިނުމުގެ ބޭނުމުގައި މަތީ ތަޢުލީމް ޙާޞިލުކުރާ ދަރިވަރުންގެ ފަރާތުން ކުރިއަށް ގެންދާ ސިލްސިލާ ފޯރަމެކެވެ.
