ރޯދަމަހު އިންތިހާބު ނުބާއްވަން ހުށަހެޅި ބިލު ދިރާސާ ކުރަން ކޮމިޓީއަށް ފޮނުވައިފި

އަންނަ ރޯދަމަހުގެ ފުރަތަމަ ހަފްތާގައި ރައްޔިތުންގެ މަޖިލީހުގެ އިންތިހާބު ބާއްވަން އިލެކްޝަންސް ކޮމިޝަނުން ނިންމާފައިވާތީ، އެކަން ބަދަލުކޮށް ރޯދަމަހުގެ ފަހުން އިންތިހާބު ބާއްވަން ޖެހޭގޮތަށް އިންތިހާބުތަކާ ބެހޭ އާންމު ގާނޫނަށް ހުށަހެޅި އިސްލާހު، ދިރާސާ ކުރުމަށް މަސްމެންބަރުންގެ ކޮމިޓީއެއް އެކުލަވާލާ އެކޮމިޓީއަށް އެ ބިލް ފޮނުވައިފިއެވެ. އެކަމަށް އެކުލަވައިލި ފަސް މެންބަރުންގެ ކޮމިޓީގެ މުގައްރިރަކަށް ހަމަޖައްސާފައިވަނީ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ އެވެ. ނައިބު މުގައްރިރަކަށް އިންތިހާބު ކޮށްފައިވަނީ ޖުމްހޫރީ ޕާޓީއަށް ނިސްބަތްވާ ކެންދޫ ދާއިރާގެ މެންބަރު އަލީ ހުސެއިން އެވެ. ދިވެހި ރައްޔިތުންގެ ޑިމޮކްރެޓިކްޕާޓީ، އެމްޑީޕީގެ ފަރާތުން މި ބިލު ރައްޔިތުންގެ މަޖިލީހަށް އިއްޔެ ހުށަހެޅުއްވީ އިހަވަންދޫ ދާއިރާގެ މަޖިލިސް މެންބަރު މުހައްމަދު ޝިފާއުއެވެ.

މަޖިލީހަށް ބިލު ހުށަހަޅުއްވަމުން ޝިފާއު ވިދާޅުވީ، މިއީ މިހާރު ގާނޫނު އޮތް ގޮތުން މިއަހަރުގެ ރައްޔިތުންގެ މަޖިލީހުގެ އިންތިހާބު އަންނަ ބަރަކާތްތެރި ރަމަޟާން މަހާ ދިމާވާތީ ކުރިމަތިވާނެ ދަތިތަކަށް ހައްލު ހޯދުމަށްޓަކައި ހުށަހެޅުއްވި ބިލެއް ކަމަށެވެ.

އިބުތިދާއީ ބަހުސަށްފަހު މި ބިލު މަޖިލީހަށް ބަލައިގަންނަން ފެންނަ ކަމަށް ފާސްކުރީ މިއަދުގެ ޖަލްސާގައި ތިއްބެވި 51 މެންބަރުންގެ ތެރެއިން 39 މެންބަރުން ފެންނަ ކަމަށް ވޯޓު ދެއްވައިގެންނެވެ. ނުފެންނަ ކަމަށް 11 މެންބަރުން ވޯޓު ދެއްވިއެވެ. ބިލު ބަލައިގެނަ އިތުރަށް ދިރާސާ ކުރުމަށް ފަސް މެންބަރުންގެ ކޮމިޓީއަކަށް ފޮނުވަން މަޖިލީހުން ވަނީ ފާސްކޮށްފައެވެ.

މި އިސްލާހު ފާސްވެއްޖެނަމަ އެއަށްފަހު އެއްވެސް އިންތިހާބެއް ރޯދަމަހުގެ ތެރެއަކު ނުބޭއްވޭނެއެވެ. މިއީ އެމްޑީޕީން ހުށައަޅާ ފައިބިލަކަށްވާއިރު މިހާރުގެ ސަރުކާރަށް ތާއީދުކުރާ މެންބަރުން ވަނީ މި ބިލާ ދެކޮޅުހައްދަވާފައެވެ.