ރިޔާސީ އިންތިހާބަށް ސޮއި ހަމަ ކުރަން ފަށައިފިން: ޑރ. މުނައްވަރު

މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި އަމިއްލަ ގޮތުން ވާދަ ކުރައްވާނެކަން އިއުލާން ކުރައްވާފައިވާ ކުރީގެ ބަންޑާރަ ނައިބު ޑރ. މުހައްމަދު މުނައްވަރު ކެންޑިޑެސީ ފޯމު ހުށަހެޅުމަށް ހަމަ ކުރަން ޖެހޭ ސޮއި ހަމަ ކުރުމުގެ މަސައްކަތް ފަށައިފި އެވެ. 'މިނިވަން' މައުލޫމާތު ދެއްވަމުން މުނައްވަރު ވިދާޅުވީ ސޮއި ހަމަ ކުރުމުގެ މަސައްކަތް މިހާރު ކުރައްވަމުން ގެންދަވާ ކަމަށާއި ކެންޑިޑެސީ ފޯމް އޮގަސްޓް ހަތެއްގެ ކުރިން އީސީއަށް ހުށަހަޅާނެ ކަމަށެވެ. ރަނިންމޭޓާއި ބެހޭ ގޮތުން ސުވާލު ކުރެއްވުމުން މުނައްވަރު ވިދާޅުވީ އަދި ރަނިންމޭޓަކަށް ވާނެ ބޭފުޅެއް ކަނޑައަޅާފައި ނުވާ ކަމަށެވެ. ރިޔާސީ އިންތިހާބުގައި ވާދަ ކުރަން ބޭނުންވާ އަމިއްލަ ކެންޑިޑޭޓުނަށް އިންތިހާބުގައި ވާދަ ކުރެވޭނީ އުމުރުން 18 އަހަރުވެފައިވާ 1،500 މީހުންގެ ސޮއި ހިމެނޭ ލިޔުމެއް އީސީއަށް ހުށަހެޅުމުންކަމަށް އީސީން ވަނީ ބުނެފަ އެވެ. އެ ލިޔުމުގައި އެމީހުންގެ ފުރިހަމަ ނަމާއި، އައިޑީ ކާޑު ނަންބަރާއި، ދާއިމީ އެޑްރެހާއި، އަދި ސޮއި ހިމެނެން ޖެހޭނެ ކަމަށްވެސް އެ ކޮމިޝަނުން ބުންޏެވެ. މީގެ އިތުރުން އިންތިހާބުގައި ވާދަ ކުރައްވާ ހުރިހާ ކެންޑިޑޭޓުންވެސް އީސީއަށް 100،000 ރުފިޔާ ދައްކަން ޖެހޭނެ އެވެ.