ރައީސް ޔާމީންގެ ކެންޑިޑެސީ ފޯމް ރިޖެކްޓް ކޮށްފި

ޕީޕީއެމްގެ ރިޔާސީ ޓިކެޓްގައި ރިޔާސީ އިންތިހާބުގައި ވާދަކުރުމަށް މިއަދު ކެންޑިޑެސީ ފޯމް ހުށަހެޅި ކުރީގެ ރައީސް އަބްދުﷲ ޔާމީންގެ ކެންޑިޑެސީ ފޯމް ބަލައިނުގަންނަން އިލެކްޝަންސް ކޮމިޝަނުން ނިންމައިފި އެވެ. ރައީސް ޔާމީންގެ ކެންޑިޑެސީ ފޯމް އީސީއަށް ހުށަހެޅީ މިއަދު ހެނދުނުގެ ވަގުތެއްގަ އެވެ. އީސީގެ ފަރާތުން ފޯމާއި ހަވާލުވެވަޑައިގަތީ އެ ކޮމިޝަންގެ ރައީސް ފުއާދް ތައުފީގެވެ. ޕީޕީއެމްގެ ރިޔާސީ ކެންޑިޑޭޓް ރައީސް ޔާމީންގެ ކެންޑިޑެސީ ފޯމް ބަލައިނުގަންނަން އީސީން ނިންމާފައިވަނީ ރައީސް ޔާމީނަށް އިއްވާފައިވާ ހުކުމް މަތީ ކޯޓަކުން ބާތިލް ނުކޮށް އިތުމުން ކަމަށް މައުލޫމާތު ލިބެ އެވެ. ޕީއެންސީގެ ނައިބު ރައީސް އާދަމް ޝަރީފް 'މިނިވަން' ނޫހަށް މައުލޫމާތު ދެއްވަމުން ވިދާޅުވީ ރައީސް ޔާމީންގެ ކެންޑިޑެސީ ފޯމް ރިޖެކްޓް ކުރިކަން ރަސްމީކޮށް އަންގާފައިވާ ކަމަށެވެ. ރައީސް ޔާމީންގެ ކެންޑިޑެސީ ފޯމް އީސީއާއި ހަވާލުކުރުމަށް މިއަދު ބޭއްވި ރަސްމިއްޔާތުގައި އެ ކޮމިޝަންގެ ނައިބު ރައީސް ވަނީ ފޯމާއި މެދު ވިހާވެސް އަވަހަށް ގޮތެއް ނިންމާނެ ކަމަށް ވިދާޅުވެފަ އެވެ. އަދި ގަސްތުގައި ލަސް ނުކުރައްވާނެ ކަމަށާއި މިއަދު 18:00 ގެ ކުރިން ފޯމާއި މެދު ގޮތެއް ނިންމުމަށް މަސައްކަތް ކުރައްވާނެ ކަމަށްވެސް ވިދާޅުވި އެވެ. އީސީއަށް ފޯމް ހުށަހެޅުއްވުމަށްފަހު ރައީސް ޔާމީންގެ ރަނިންމޭޓަކަށް ކަނޑައަޅުއްވާފައިވާ ޑރ. ޖަމީލް ވަނީ ރައީސް ޔާމީންގެ ކެންޑިޑެސީ ފޯމް ރިޖެކްޓް ކޮށްފިނަމަ ސްޕްރީމް ކޯޓަށް މައްސަލަ ހުށަހަޅަން ތައްޔާރުކަމަށް ވިދާޅުވެފަ އެވެ.