ރައީސް ނަޝީދު، އަންނަ ބުރާސްފަތި ދުވަހު، ދަ ޑިމޮކްރެޓްސްއަށް ސޮއި ކުރައްވަނީ

އަންނަ ބުރާސްފަތި ދުވަހު ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައިސް މުހައްމަދު ނަޝީދު ދި ޑިމޮކްރެޓްސް އަށް ސޮއި ކުރައްވާނެ އެވެ. ރައީސް ނަޝީދު އެ ޕާޓީ އަށް ސޮއި ކުރުން އޮތީ ޕާޓީގެ ފަރާތުން އާޓިފިޝަލް ބީޗުގައި ބާއްވާ ހާއްސަ ޖަލްސާ އެއްގައެވެ. ޑިމޮކްރެޓްސްގެ ދެ ހަރަކާތަކުން ރައީސް ނަޝީދު ފެނިފައި ވީނަމަވެސް އެމަނިކުފާނު އެ ޕާޓީއަށް ސޮއިކޮށްފައެއް އަދި ނުވެއެވެ. އެކަމާ ގުޅިގެން މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވީ، ޑިމޮކްރެޓްސްގެ ޖަލްސާއެއް އަންނަ ބުރާސްފަތި ދުވަހުގެ ރޭ ބޭއްވުމަށް ހަމަޖެހިފައިވާކަމަށެވެ. އަދި އެ ޖަލްސާގައި ރައީސް ނަޝީދު ޕާޓީއަށް ސޮއި ކުރައްވާނެ ކަމަށާއި، ރައީސް ނަޝީދުގެ އިތުރަށް، ޕާޓީއާއި އެހެން ބައެއް މެމްބަރުންތައް ވެސް އަލަށް ގުޅޭނެކަމަށް ވެސް އާޒިމް ވިދާޅުވިއެވެ. ރައީސް ނަޝީދު ވަނީ އެމްޑީޕީގެ ރައީސްގެ މަގާމުގައި ހުންނަވާ މިދިޔަ މަހުގެ 21 ވަނަ ދުވަހު އެ ޕާޓީން ވަކިވެވަޑައިގެންފައެވެ. ދަ ޑިމޮކްރެޓްސް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ) އިން ދިނީ މިމަހުގެ ދެވަނަ ދުވަހުއެވެ. އެ ޕާޓީއަށް ހުއްދަ ދޭން ނިންމީ, އެކަމަށް އީސީން ބާއްވަން ޖެހޭ ބައްދަލުވުން ކޯރަމް ހަމަނުވެގެން ނުބޭއްވިގެން މައްސަލަ ހޫނުވެފައި ވަނިކޮށް އޮންލައިންކޮށް އެ ކޮމިޝަނުގެ މެންބަރުންނަށް ގުޅާ މަޝްވަރާ ކުރުމަށްފަހު އެވެ.

ޑިމޮކްރެޓްސް އުފައްދަން ބޭނުންވާ 3000 މީހުންގެ ސޮއި ހަމަކޮށް އީސީ އަށް ހުށަހެޅީ މިދިޔަ މަހުގެ އެއްވަނަ ދުވަހުއެވެ.