ރައީސް ޑރ.މުއިއްޒު ވިދާޅުވީ މަދުވެގެން 62 ގޮނޑި ބޭނުންވާކަމަށް

ކުރިއަށްއޮތް ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީ ކޯލިޝަނުން މަދުވެގެން 62 ގޮނޑި ކާމިޔާބު ކުރާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. މިއަދު ކުރިއަށްދިޔަ ޕްރޮގްރެސިވް ކޮންގްރެސް ކޯލިޝަނުގެ ކުރިއަށް އޮތް ދައުރުގެ ރައްޔިތުން މަޖިލިސް އިންތިހާބުގެ ޕްރައިމަރީގެ ވޯޓުލުން ކުރިއަށްދިޔަގޮތް ބައްލަވާލެއްވުމަށްފަހު ނޫސްވެރިންނާ ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ސަރުކާރުން ކުރަމުންގެންދާ މަސައްކަތްތައް ރައްޔިތުން ބަލައިގަންނަ ކަމަށާއި، ވެރިކަންކުރާ ކޯލިޝަނަށް 62 ގޮނޑި ލިބޭނޭކަމުގެ ޔަގީންކަން އެބައޮތް ކަމަށެވެ. ރައީސް ވިދާޅުވީ ރައްޔިތުންނަށް ހިދުމަތްކުރުމުގައި މި ސަރުކާރުގެ އޮތީ އިހުލާސްތެރިކަން ކަމަށާއި، އެކަން ރައްޔިތުން ބަލައިގަންނަ ކަމަށް އުއްމީދުކުރާ ކަމަށެވެ.، ޕްރިމަރީގައި ޕާޓީގެ ދަފްތަރަށް އައި ބަދަލާ ގުޅޭގޮތުން ރައީސް ވިދާޅުވީ ދަފްތަރަށް ބަދަލު ގެނައިކަމަށް ގަބޫލު ނުކުރެވޭ ކަމަށާއި، ބައެއް ފަރާތްތަކުން ކަމުގެ ހަގީގަތް ރަނގަޅަށް ބަލައި ނުލައި ޝަކުވާ ހުށަހަޅާފައި އެބަހުރި ކަމަށެވެ. ޕްރައިމަރީގައި ހަމަނުޖެހުންތަކެއް ފެނިގެންދިޔަ ނަމަވެސް އެކަން ހައްލުވެ، ވޯޓުލުމުގެ ކަންކަން ރަނގަޅަށް ދިޔަކަަމަށް ރައީސް ވަނީ ފާހަގަކުރައްވާފައެވެ. https://twitter.com/pnc_secretariat/status/1751205594504274348 ޕީޕީއެމް/ޕީއެންސީގެ މަޖިލިސް ޕްރައިމަރީ އިންތިހާބުގައި މިފަހަރު 73 ދާއިރާއަކުން 71،000 ހަށްވުރެ ގިނަ މީހުންނަށް ވޯޓުލުމުގެ ހައްގު ލިބިގެންވާކަމަށް ޕީއެންސީން ވަނީ ބުނެފައެވެ. ޕީޕީއެމް/ޕީއެންސީ މަޖިލިސް ޕްރައިމަރީ ވޯޓުލުން ނިމިފައިވާއިރު، ބައެއް ދާއިރާތަކަށް އިތުރު މެމްބަރުން ކުރިމަތި ނުލާތީވެ، ޕްރައިމަރީއަކާ ނުލައި ޕީޕީއެމް/ ޕީއެންސީގެ 13 މެމްބަރަކަށް ރައްޔިތުން މަޖިލީހުގެ މެމްބަރުކަމަށް ވާދަކުރުމަށް ޓިކެޓް ވަނީ ކަށަވަރުވެފައެވެ. ޓިކެޓް ކަށަވަރުވި މެމްބަރުންގެ ތެރޭގައި އެންމެ ފާހަގަކޮށްލެވެނީ، ޕީއެންސީގެ ޗެއާޕާސަން އަދި ރައީސްގެ އިސް އެޑްވައިޒަރު އަބްދުއްރަހީމް އަބްދުﷲ އާއި، ޕީއެންސީގެ ނައިބު ރައީސް އިސްމާއިލް ޝުޖާއުގެ އިތުރުން އޭދަފުށި ދާއިރާގެ މެމްބަރު އަހުމަދު ސަލީމެވެ.