ޕީއެންސީން ރިޔާސީ އިންތިހާބުގައި ވާދަކުރަން ނިންމައިފި

އަންނަ މަހު ބޭއްވުމަށް ހަމަޖެހިފައިވާ މިއަހަރުގެ ރިޔާސީ އިންތިހާބުގައި ޕީއެންސީގެ ފަރާތުން ކެންޑިޑޭޓެއް ނެރެން އެ ޕާޓީން ފާސްކޮށްފި އެވެ. މިގޮތަށް ނިންމާފައިވަނީ މިހާރު ކުރިއަށްދާ އެ ޕާޓީގެ މަޝްވަރާ މަޖިލީހުގެ ބައްދަލުވުމުގެ ތެރެއިންނެވެ. އެ ބައްދަލުވުމުގައި އެ ޕާޓީން ރިޔާސީ އިންތިހާބުގައި ވާދަކުރަން ފެންނަ ކަމަށް ވޯޓުލާފައިވަނީ 47 މެންބަރުންގެ ތެރެއިން 44 މެންބަރުންނެވެ. ރިޔާސީ އިންތިހާބުގައި ޕީއެންސީން ވާދަކުރަން ނިންމުމާއިއެކު ދެން ކުރިއަށް އޮންނާނީ އެ ޕާޓީގެ ޓިކެޓަށް ވާދަ ކުރުމަށް ހުޅުވާލުމެވެ. ޕީއެންސީން ކެންޑިޑޭޓެއް ނެރެން ނިންމާފައި މިވަނީ ޕީޕީއެމްގެ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންއަށް ވާދަ ނުކުރެވޭ ހާލަތެއްގައި އެ ދެ ޕާޓީގެ ކެންޑިޑޭޓެއްގެ ގޮތުގައި ބޭފުޅަކު ނެރެން އެމަނިކުފާނު ލަފާ އެރުވުމުންނެވެ. އަދި އެ ކެންޑިޑޭޓް ވާން ޖެހޭނީ އިދިކޮޅު ލީޑަޝިޕްގައި ހިމެނޭ ބޭފުޅަކަށް ކަމަށްވެސް ޔާމީން އަންގަވާފައިވާކަމަށްވެސް މައުލޫމާތު ލިބެ އެވެ. ޕީޕީއެމްގެ މައި އޮފީހުގައި މިހާރު ކުރިއަށްދާ ބައްދަލުވުމުގެ އެޖެންޑާގައި ވަނީ ޕީއެންސީން އިންތިޚާބުގައި ވާދަކުރުމާ މެދު ރަސްމީކޮށް ގޮތެއް ނިންމުމާއި އަދި ކެންޑިޑޭޓަކު ކަނޑައެޅުމަށް އަމަލު ކުރާނެ ގޮތެއް ނިންމުމަށް ހިމަނާފަ އެވެ. އަދި އަސާސީ ގަވާއިދަށް ގެންނަން ޖެހޭ ބަދަލުތައް ގެނައުމަށްވެސް ހިމަނާފައިވެ އެވެ. ޕީއެންސީ ރިޔާސީ ޓިކެޓަށް މިވަގުތު ނުރަސްމީކޮށް ޝައުގުވެރިކަން ފާޅުކޮށްފައިވަނީ މާލޭގެ މޭޔަރު ޑރ. މުހައްމަދު މުއިއްޒާއި ޕީއެންސީގެ ނައިބު ރައީސް އާދަމް ޝަރީފް އެވެ. ޕީއެންސީ ސެނެޓުގެ މި ނިންމުމާއެކު އެޕާޓީގެ ޓިކެޓަށް ވާދަކުރައްވަން ޝައުގުވެރިވާ ފަރާތްތަކަށް ފުރުސަތު ހުޅުވާލާނެއެވެ. ކެންޑިޑޭޓަކު ކަނޑައެޅުމަށް ބާއްވާ އިންތިހާބު ބޭއްވުމަށް ހަމަޖެހިފައިވަނީ މިއަދު ހަވީރު 4 ޖަހާއިރު އެވެ. މި އިންތިހާބުގައި ލާނީ ސިއްރު ވޯޓެކެވެ.