ޕްލޭނިން މިނިސްޓްރީގެ ޑެޕިއުޓީ މިނިސްޓަރު ނިއުމާ އިސްތިއުފާ ދެއްވައިފި

ޕްލޭނިން މިނިސްޓްރީގެ ޑެޕިއުޓީ މިނިސްޓަރު ފާތިމަތު ނިއުމާ އެ މަގާމުން އިސްތިއުފާ ދެއްވައިފި އެވެ. ނިއުމާ ޕްލޭނިން މިނިސްޓްރީގެ ޑެޕިއުޓީ މިނިސްޓަރުކަމުން އިސްތިއުފާ ދިންކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް އަންގާ ސިޓީއެއް ވަނީ ފޮނުވާފަ އެވެ. އެ ސިޓީގައި މަގާމުން އިސްތިއުފާ ދެއްވި ސަބަބެއް ބަޔާންކޮށްފައެއް ނުވެ އެވެ. މި ސަރުކާރުގައި ޕްލޭނިން މިނިސްޓްރީގެ ޑެޕިއުޓީ މިނިސްޓަރުކަމަށް ނިއުމާ އައްޔަންކޮށްފައިވަނީ އެމްޑީޕީގެ ސްލޮޓެއްގަ އެވެ. ޕްލޭނިން މިނިސްޓަރީގެ ޑެޕިއުޓީ މިނިސްޓަރުކަމުން އިސްތިއުފާ ދެއްވުމަށްފަހު ނިއުމާ ވަނީ މިއަދު ޑިމޮކްރެޓްސްއާއި ގުޅިވަޑައިގެންފަ އެވެ. އެހެންކަމުން ބޮޑަށް ގަބޫލު ކުރެވެނީ ނިއުމާ މަގާމުން އިސްތިއުފާ ދެއްވީ އެމްޑީޕީ ދޫކުރައްވާ ޑިމޮކްރެޓްސްއާއި ގުޅިވަޑައިގަތުމަށް ކަމަށެވެ.