މަޖިލިސް ޕްރައިމަރީއަށް ޝައުގުވެރިކަން ފާޅުކުރި މީހުންގެ ލިސްޓް އެމްޑީޕީން އާއްމުކޮށްފި

ކުރިއަށްއޮތް ރައްޔިތުން މަޖިލީހުގެ ދާއިރާތަކަށް ވާދަކުރުމަށް ޝައުގުވެރިކަން ފާޅުކުރުމަށް އެމްޑީޕީން ހުޅުވާލި ފުރުސަތުގައި އެކަމަށް ޝައުގުވެރިކަން ފާޅުކުރި ފަރާތްތަކުގެ ލިސްޓް އެޕާޓީން މިއަދު އާއްމުކޮށްފިއެވެ. އެމްޑީޕީން ބުނީ މި ލިސްޓްގައި މަޖިލީހަށް ޝައުޤުވެރިކަން ފާޅުކުރި ފަރާތްތަކުގެ ތެރެއިން ޕްރައިމަރީ ބާއްވަންޖެހޭ ދާއިރާތަކާއި، އެދާއިރާތަކަށް ކުރިމަތިލެއްވި ކެންޑިޑޭޓުންގެ ނަންތައް ކެންޑިޑޭޓް ނަންބަރާއިއެކު ހިމެނޭ ކަމަށެވެ. https://twitter.com/MDPSecretariat/status/1746511607927328773 ދާއިރާތަކުގެ ޕްރައިމަރީ ބޭއްވުމަށް އެމްޑީޕީން ތާވަލުކޮށްފައިވަނީ ،އަންނަ ފެބުރުއަރީމަހުގެ 3 ވާ ހޮނިހިރު ދުވަހުއެވެ. އެމްޑީޕީން މަޖިލީސް ޕްރައިމަރީ ބާއްވާނޭ ތާރީހެއް ކަނޑައަޅާފައިވާއިރު، އެޕާޓީން ކުރިންވެސް ބުނެފައިވަނީ މޭޔަރު އިންތިހާބަށްފަހު ޕްރައިމަރީ ބާއްވާނޭ ތާރީހެއް އިއުލާނު ކުރާނޭ ކަމަށެވެ. އިއްޔެ ބޭއްވި މާލޭގެ މޭޔަރު ހޮވުމަށް ބޭއްވި ބައި އިލެކްޝަން ކާމިޔާބުކޮށްފައިވަނީ އިދިކޮޅު އެމްޑީޕީގެ ކެނޑިޑޭޓް އާދަމް އާޒިމެވެ. ކުރިއަށްއޮތް ރައްޔިތުންގެ މަޖިލީހުގައި މުޅިން އަލަށް ހަ ދާއިރާއެއް އިތުރުވާނެއެވެ. އެއާއެކު ފެށޭ 20 ވަނަ މަޖިލީހުގައި މެމްބަރުންގެ ގޮތުގައި 93 މެމްބަރުން ތިއްބަވާނެއެވެ. މިހާރު ރައްޔިތުންގެ މަޖިލީހުގައި ދާއިރާތައް ތަމްސީލްކުރައްވާ މެމްބަރުންގެ އަދަދަކީ 87 އެކެވެ.