އިލްޔާސް ދޮރުން ދޮރަށް ހަރަކާތް ފައްޓައިފި

ރިޔާސީ އިންތިހާބުގައި "ދަ ޑިމޮކްރެޓްސް"ގެ ޓިކެޓުގައި ވާދަ ކުރައްވާ އިލްޔާސް ލަބީބް މާލޭގައި ދޮރުން ދޮރަށް ހަރަކާތް ފައްޓަވައިފި އެވެ. އިލްޔާސް ދޮރުން ދޮރަށް ހަރަކާތް ފައްޓަވާފައިވަނީ އިއްޔެ ޑިމޮކްރެޓްސްއިން ބޭއްވި އެ ޕާޓީގެ ޕްރައިމަރީ ކާމިޔާބު ކުރެއްވުމަށްފަހު އެވެ. ޑިމޮކްރެޓްސްގެ ރިޔާސީ ޕްރައިމަރީގައި ވާދަ ކުރެއްވީ އިލްޔާސް އެކަންޏެވެ. އެހެންކަމުން އެ ޕާޓީން ބޭއްވީ ފެންނަ ނުފެންނަ ވޯޓެކެވެ. އެ އިންތިހާބުގައި ޖުމުލަ 3،203 މީހުން ވޯޓު ލީ އިރު އިލްޔާސްއަށް ރިޔާސީ ޓިކެޓް ދޭން ފެންނަ ކަމަށް ވޯޓު ދީފައިވަނީ 3،041 މީހުންނެވެ. މާލޭގައި ޑިމޮކްރެޓްސްއިން މިއަދު ދޮރުން ދޮރަށް ހަރަކާތް ފެއްޓި އިރު ޑިމޮކްރެޓްސްއިން އަންނަނީ އެކި ރަށްރަށުގައި ކެމްޕޭން ހަރަކާތްތައް ހިންގަމުންނެވެ. އެގޮތުން އެ ޕާޓީގެ މެނިފެސްޓޯ ހެދުމަށްވެސް އެ ޕާޓީން ވަނީ ރަށްރަށަށް ޒިޔާރާތް ކޮށްފަ އެވެ. މީގެ އިތުރުން ޑިމޮކްރެޓްސްގެ ކެމްޕޭނަށް ކުރީގެ ރައީސް މުހައްމަދު ނަޝީދާއި ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް ވަނީ މިއަދު އައްޑޫއަށް ދިއުމަށް ހަމަޖެހިފަ އެވެ.