ޑރ.ޝަހީމުގެ އަބުރުކަތިލުމަށް ފަތުރަމުންގެންދާ ދޮގުވާހަކަތައް ކުއްވެރިކޮށް އެކަން ވަގުތުން ހުއްޓާލުމަށް ޕީއެންސީން ގޮވާލައިފި

ނިމިދިޔަޔަ ހަފްތާގައި އިސްލާމިކު މިނިސްޓަރ ޑރ.ޝަހީމަށް އަމާޒްކޮށް ގިނަ ތުހުމަތުތަކެއްކޮށް ސޯޝަލް މީޑިއާގައި ތަފާތު ވާހަކަތަކާއި ވީޑިއޯތަކެއް ދައުރުކޮށްފައިވަނިކޮށް، ހަގީގަތާ ހިލާފަށް ޑރ.ޝަހީމުގެ އަބުރުކަތިލުމަށް ދޮގުމައުލޫމާތު ފަތުރަމުންގެންދާކަމަށް ބަޔާންކޮށް އެކަން ޕީޕީއެމް، ޕީއެންސީ ކޯޅިޝަނުން ހަރުކަށިއިބާރާތުން ކުއްވެރިކޮށް ބަޔާނެއް ނެރެފިއެވެ. ޕީއެންސީން ނެރުނު ބަޔާނުގައި ބުނެފައިވަނީ ޑރ.ޝަހީމަކީ މުޅިދުނިޔޭގައިވެސް ނަންހިނގާ ހުލްގުހެޔޮ ދީނީ ލީޑަރެއްކަމަށާއި، އެމަނިކުފާނުގެ ޙިދުމަތް މުޅި ދުނިޔެވެސް ބަލައިގެންފައިވާ ބޭފުޅެއްކަމަށެވެ. އަދި ދީނީ ސިޔާސަތުތައް ކުރިއެރުވުމަށާއި ޑރ.މުއިއްޒުގެ ދީނީ ސިޔާސަތުތައް ތަންފީޒްކުރުމަށް އެމަނިކުފާނު ކުރައްވަމުންގެންދާވާ މަސައްކަތް އެކޯލިޝަނުން ފުރިހަމައަށް ބަލައިގަންނަކަމަށެވެ. އަދި އިތުރަށް އެބަޔާނުގައި ބުނެފައިވަނީ ޑރ.ޝަހީމަކީ ކީރިތި ގުރުއާން ހިތުދަސް، ދީނީ އިލްމު އުނގެނިވަޑައިގެން ހުންނެވި އަޒުމް ވަރުގަދަ ބޭފުޅެއްކަމަށެވެ. އެހެންކަމުން އެމަނިކުފާނުގެ އަބުރު ކަތިލުމަށް ބަޔަކު ކުރަމުންގެންދާ ހަޑިމުޑުދާރު ނާތަހްޒީބުކަންކަން މިހާރުން މިހާރަށް ހުއްޓާލުމަށްވެސް އެބާނުގައި ގޮވާލާފައިވެއެވެ.