ދާދި އަވަހަށް ރާއްޖޭގެ އިގްތިސާދީ ކަނޑުގެ ސަރަހައްދު ބެލެހެއްޓޭނެ ގޮތް ހަމަޖެހިގެންދާނެ: ރައީސް

ރާއްޖޭގެ އިގްތިސާދީ ކަނޑުގެ ސަރަހައްދު ބަލަހައްޓާނީ ދިވެހިން ކަމަށާއި، ދާދި އަވަހަށް އެކަން ކުރާނޭ އިންތިޒާމުތައް ހަމަޖެހިގެންދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. ތ.އަތޮޅު ވޭމަންޑޫއަށް ވަޑައިގެން މިރޭ ބޭއްވި ޖަލްސާގައި ރާއްޖޭގެ ކަނޑުގެ ސަރަހައްދު ބެލެހެއްޓުމާއި ގުޅޭގޮތުން ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، މަސްވެރިކަމުގެ ސިނާއަތަށް ބެލި ނަމަވެސް ރާއްޖޭގެ ކަނޑުގެ ސަރަހައްދަކީ ހިމާޔަތްކުރަންޖެހޭ ސަރަހައްދެއް ކަމަށާއި، ދިވެހިރާއްޖޭގެ މިނިވަންކަމާއި ސިޔާދަތީ ބާރުގެ ރައްކާތެރިކަން ކަށަވަރުކުރުމަށްވެސް ރާއްޖޭގެ ކަނޑުގެ ސަރަހައްދު ހިމާޔަތްކުރުމަކީ މުހިއްމު ކަމެއް ކަމަށެވެ. ރައީސް ވިދާޅުވީ ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ކަންކަން މިއަދާހަމަޔަށް އާއިރުވެސް ބެލެހެއްޓިފައި ނުވާކަމަށާއި، ރާއްޖޭގެ ކަނޑުގެ ސަރަހައްދު ބެލެހެއްޓުމަށް ބޭރުގެ ބަޔަކު ތިބުމަކީ ދިވެހިން އެދޭނޭ ގޮތެއް ނޫންކަމަށެވެ. "އަޅުގަނޑުމެން ގޯތީގެ ވަށާފާރުގެ އިންފާރުގެ އެތެރެ ބަލަހައްޓަންޖެހޭނީ އެހެން ބަޔަކު އައިސްގެންތޯ. ނުވަތަ އަޅުގަނޑުމެން އަމިއްލައަށް އަޅުގަނޑުމެންގެ ކެޕޭސިޓީ އިތުރުކޮށްގެންތޯ އެއީ މި އުފެދޭ ސުވާލަކީ" ރައީސް ވިދާޅުވިއެވެ. ރައީސް ވިދާޅުވީ ރާއްޖޭގެ ކަނޑުގެ މި ބިޔަ ބޮޑު ސަރަހައްދު ބެލެހެއްޓޭނެ ގޮތް ވަރަށް އަވަހަށް ހަމަޖެހިގެންދާނޭ ކަމަށާއި މި ސަރުކާރުން އެކަން ކުރާނޭކަމަށެވެ. އެކަމަށްޓަކައި ކުރަންޖެހެ ކަންކަން ކުރަން ފަށައި، ވަރަށް އަވަހަށް އަމަލީގޮތުން އެކަންކުރާ މަންޒަރު ފެނިގެންދާނޭކަމަށެވެ..