އަމީތާބުގެ ކާފަދަރި އާރަދްޔާ ބަޗަންގެ ފޭކް ވީޑިއޯ އާއި ގޯސް މައުލޫމާތު ގޫގްލް އާއި އިންޓަނެޓްގެ އެހެން ވެބްސައިޓްތަކުން ނަގާދިނުމަށް އެދި އިންޑިއާގެ ހައިކޯޓަށް ހުށަހެޅި މައްސަލާގައި ހައިކޯޓުގެ އަމުރު އެ ފަރާތްތަކުން ތަންފީޒުކޮށްފައިނުވާތީ އަނެއްކާވެސް އެ މައްސަލަ އިންޑިއާގެ ހައިކޯޓަށް ހުށަހަޅައިފިއެވެ.
އަމީތާބުގެ ދަރިފުޅު އަބީޝެކް ބަޗަން އާއި އައިޝްވާރްޔާ ރާއީގެ ދޮށީ ދަރިކަނބަލުން އާރަދްޔާ ބަޗަންގެ ފޭކް ވީޑިޢޯއާއި ފޯޓޯއާއި އަދި ގޯސް މައުލޫމާތު ވެބްސައިޓްތަކުގައި ފަތުރަމުންދާތީ އެ ތަކެތި ވެބްސައިޓްތަކުން ނަގާދިނުމަށް އަމުރުކޮށްދިނުމަށް އެދި އިންޑިއާގެ ހައިކޯޓަށް ކުރިން ހުށަހެޅި މައްސަލާގައި އިންޑިއާގެ ހައިކޯޓުން ވަނީ ގޫގްލް އާއި، ބޮލީވްޑް ޓައިމްސް އާއި އެހެނިހެން ބައެއް ވެބްސައިޓު ތަކުން އެ ފޮޓޯތަކާއި ވީޑިއޯ ތަކާއި ފޭކް މައުލޫމާތު ނެގުމަށް ހައިކޯޓުން ވަނީ އަމުރުކޮށްފައެވެ.
އުމުރުން 13 އަހަރުގެ އާރަދްޔާ ބަޗަންގެ ފަރާތުން ހުށަހެޅި މައްސަލއާއި ގުޅިގެން ހައިކޯޓުން ގޫގްލް އާއި ޔޫޓިއުބް އަދި ބައެއް ވެބްސައިޓް ތަކުގެ މައްޗަށް އިއްވާފައިވާ ހުކުމުގައި، ޖިސްމާނީ އަދި ނަފްސާނީ ދުޅަހެޔޮކަމަށް ބަލާއިރު ކޮންމެ މީހަކަށް ވެސް އަދި ސެލެބްރިޓީއަކަށް ވިޔަސް ކަރާމާތުގެ ހައްގު ލިބިގެންވާ ކަމަށް ކޯޓުން ވަނީ ބުނެފަ އެވެ.
އާރަދްޔާ ގެ ފަރާތުން އަނެއްކާވެސް އެ މައްސަލަ ހުށަހެޅުމާ ގުޅިގެން އިންޑިއާގެ ހައިކޯޓުން މި މަހުގެ 17 އަށް އެ މައްސަލަ ވަނީ ތާވަލް ކޮށްފައެވެ.
