ރައީސުލް ޖުމްހޫރިއްޔާގެ މަޤާމަގުހައި ހުންނެވި ޑރ މުޙައްމަދު މުއިއްޒު އަކީ ލާމަރުކަޒީ ނިޒާމުގެ ޗެމްޕިއަނެއް ނޫންކަމަށާއި، އެމަނިކުފާނަކީ ލާމަރުކަޒީ ނިޒާމުގެ އެންމެ ބޮޑު ދުޝްމަނު ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދަޅުވެއްޖެ އެވެ.
އެކްސްގައި ކުރެއްވި ޕޯސްޓްގައި ފައްޔާޒް ވިދާޅުވީ ރައީސުލް ޖުމްހޫރިއްޔާގެ މަޤާމަގުހައި ހުންނެވި ޑރ މުޙައްމަދު މުއިއްޒު އަކީ ލާމަރުކަޒީ ނިޒާމުގެ ޗެމްޕިއަނެއް ނޫންކަމަށާއި، އެމަނިކުފާނަކީ ލާމަރުކަޒީ ނިޒާމުގެ އެންމެ ބޮޑު ދުޝްމަނު ކަމަށެވެ،
އެގޮތުން ރައީސް ޑރ މުއިއްޒު ހައުސިން މިނިސްޓަރަކަށް ހުންނަވައި ސިޓީ ކައުންސިލަށް ހެއްދެވި ގޮތުން އެކަން ސާފުވާނެ ކަމަށާއި، ނަމަވެސް އެމަނިކުފަނު މޭޔަރަކަށް ހުންނެވި ދުވަސްވަރު ގަބޫލުކުރެއްވީ ހުރިހާ ބާރެއް ސިޓީކައުންސިލަށް ލިބެންޖެހޭނެ ކަމަށް ކަމަށާއި، ނަމަވެސް އޭގެ ފަހުން ވެރިކަމަށް އައިސް ފަހަރަކު ބާރެއް އަތުލައްވަމުން ގޮސް މިއަދު އެ އަތުލީ ވެރި ރަށުގައި ހުރި ހުރިހާ ބިމެއް ކަމަށެވެ.
މާލޭގެ ކަންކަން ނިންމަން މާލޭގެ ރައްޔިތުން ވޯޓުން ހޮވި ކައުންސިލެއް އޮއްވައި ސަރުކާރުން ގޮތް ކިޔުމަކީ ބަލައިގަނެވޭނެ ކަމެއް ނޫންކަމަށާއި ޕީއެންސީން ބޭނުންވަނީ ރައްޔިތުން އަޅުވެތިކޮށް ސަލާން ޖެހުވުމަށް ކަމަށްވެސް ފައްޔާޒް ވިދާޅުވެފައި ވެއެވެ.
އަދި ރާއްޖޭގެ ތަރައްގީ ގުޅިފައިވަނީ ބާރުތައް ދޫކޮށްލުމާ ކަމަށާއި އެކަން ކުރުމުގެ ވިސްނުން ހުރީ ހަމައެކަނި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކަމަށްވެސް ފައްޔާޒް ވިދާޅުވި އެވެ.
ލާމަރުކަޒީ ގާނޫނަށް އިސްލާހު ގެނައުމަށްފަހު ކައުންސިލްތަކުގެ އިހްތިސާސްގައި ހުންނަ ބިންތަކާއި ބާރުތަށް ސަރުކާރަށް ނެގުމަށް ސަރުކާރުން ކުރަމުންދާ މަސައްކަތުގެ ތެރޭއިން އިއްޔެ ވަނީ މާލޭގެ ހުރިހާ އާންމު ބިންތަކާއި ސިޓީ ކައުންސިލްގެ ދަށުގައި ހުރި ގިނަ ބިންތަކެއް ސަރުކާރަށް ނަގާފައިވާކަން ހައުސިންގ މިނިސްޓްރީން އިއުލާނުކޮށްފައެވެ.
އެގޮތުން
އެ މިނިސްޓްރީން މިއަދުކުރި އިއުލާނެއްގައި ބުނީ އެ ބިންތައް ސަރުކާރުގެ ދަށަށް ގެންދަން ނިންމީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާ އެއްގޮތަށް ކަމަށެވެ.
އެގޮތުން އެ މިނިސްޓްރީން ބުނީ 14 ބިމެއް ސަރުކާރަށް ބަދަލުކުރުމަށް ނިންމީ ރައްޔިތުންނަށް ކޮންމެހެން ބޭނުންވާ އުމްރާނީ ތަރައްގީގެ މަސައްކަތްތައް ގާއިމްކުރުން އަވަސް ކުރުމަށް ކަމަށެވެ.
އެގޮތުން ސަރުކާރަށް ނަގާފައިވާ ބިންތަކާއި އެ ބިންތަށް ސަރުކާރަށް ނެގި ސަބަބުތައް ކަމުގައި އެ އިއުލާނުގައި ބަޔާންކޮށްފައިވާ ކަންކަމަކީ:
1- ސަލްޓަން ޕާކު އަދި މިއުޒިއަމް ސަރަހައްދު: ޒަމާނީ އީ-ސްޕޯޓްސް އެރީނާއަކާއި މިއުޒިއަމް ޕާކެއް ގާއިމުކުރުން.
2- މަސް މާރުކޭޓު: އޮފީސްތަކާއި ވިޔަފާރިތަކަށް ހާއްސަކޮށްގެން ކުއްޔަށްދޭ އިމާރާތެއް އެޅުން.
3- ލޯކަލް މާރުކޭޓު އަދި ދަތުރުވެރިންގެ މާރުކޭޓު: ލޯކަލް މާރުކޭޓު ޒަމާނީ މާރުކޭޓު ކޮމްޕްލެކްސްއަކަށް ބަދަލުކުރުމާއި، ދަތުރުވެރިންގެ މާރުކޭޓު ހުރި ބިމުގައި މިކްސް-ޔޫސްޑް ކޮމާޝަލް ތަރައްގީގެ މަޝްރޫއެއް ހިންގުން.
4- ވިޔަފާރިވެރިންގެ ޖަމިއްޔާ ހިންގި ބިން: ކުޑަކުދިން ބަލަހައްޓާ ޑޭ ކެއާ ސެންޓަރަކާއި އެކުދިންގެ އެކި ހަރަކާތްތައް ހިންގާ މަރުކަޒެއް ގާއިމުކުރުން.
5- ބޮނޑިބަތް ޕާކުގައި ވިޔަފާރި ބައިތަކާއެކު ޒަމާނީ ޕާކިން އިމާރާތެއް އެޅުން
6- ކުރީގެ ހަކަތަ ޕެޓްރޯލް ޝެޑް ހުރި ބިމުގައި އިލެކްޓްރިކް ވެހިކަލް (އީވީ) ޗާޖިން ފެސިލިޓީއެއް ގާއިމުކުރުން.
7- އާޓިފިޝަލް ބީޗު ޕަބްލިކް ރެކްރިއޭޝަނަލް ފެސިލިޓީއެއްގެ ގޮތުގައި އިތުރަށް ފުރިހަމަކުރުން
8- ރަސްފަންނު ޕަބްލިކް ރެކްރިއޭޝަނަލް ފެސިލިޓީއެއްގެ ގޮތުގައި އިތުރަށް ފުރިހަމަކުރުން
9- ކައުންސިލް އެކަމަޑޭޝަން ސިޓީ ކައުންސިލް އެކަމަޑޭޝަން ބިމުގައި ލޭބާ އެކަމަޑޭޝަނާއި ސްޓޯރޭޖް ފެސިލިޓީއެއް ހެދުން
10- ކާނިވާ ސަރަހައްދު: ސިޓީ ކައުންސިލް އެކަމަޑޭޝަން ބިމުގައި ލޭބާ އެކަމަޑޭޝަނާއި ސްޓޯރޭޖް ފެސިލިޓީއެއް ހެދުމާއި، ކާނިވާ ކެފޭ ޕާކިން އޭރިއާ ރެކްރިއޭޝަނަލް އަދި ވިޔަފާރި ބޭނުންތަކަށް ތަރައްގީކުރުން.
11- ތައިސޭކޮށި މަޝްރޫއުތަކުގެ ވޯކް ސައިޓެއްގެ ގޮތުގައި ބޭނުންކުރުން
12- ޕޭ ޓޮއިލެޓް 2 ހުރި ތަނުގައި ޕަބްލިކް ފާހަނާއާއި އެއާ ގުޅޭ ވަސީލަތްތައް ގާއިމުކުރުން.
13- މަސްވެރިންގެ މައިޒާން މިހާރުވެސް އޮތް ގޮތަށް އެމްޑަބްލިއުއެސްސީގެ ޕަމްޕް ސްޓޭޝަނެއްގެ ގޮތުގައި ދެމެހެއްޓުން.
