ގއ މާމެންދޫގެ 2 ގެޔަކުން 17.7 ކިލޯގެ މަސްތުވާތަކެތި ހޯދައި އެ މައްސަލާ ގުޅުންހުރި 2 މީހަކު ހައްޔަރުކޮށްފި އެވެ.
ފުލުހުން ބުނީ މަސްތުވާތަކެތި ގިނަ އަދަދަކަށް އެތެރެކޮށް ޓްރެފިކް ކުރާކަމުގެ ތުހުމަތުގައި، މަސްތުވާތަކެތި އެތެރެކުރާ ނެޓްވޯކްގައި އިސްކޮށް އުޅޭ ކަމަށް ތުހުމަތުގައި ގއ. މާމެންދޫ / ފިޔާތޮށިވިލާ އަޒުހަދު ނަސީމް، 29، އާއި، ގއ. މާމެންދޫ / ރޯޝަނީގެ، ރިޝްފާން ރާމިޒު، 29، ހައްޔަރުކޮސްފައިވާ ކަމަށެވެ.
އަދި ގއ. އަތޮޅު ޕޮލިސް އާއި ކައުންޓަ ނާކޮޓިކްސް އިންޓެލިޖެންސް އަދި ޑްރަގް އެންފޯސްމެންޓް ގުޅިގެން ހިންގި މި މަހުގެ 2 ވަނަ ދުވަހު ހިންގި މި އޮޕަރޭޝަނުގައި އެ މީހުން ހައްޔަރުކޮސް އެމީހުންނާ ގުޅުންހުރި ގއ. މާމެންދޫގެ 2 ގެޔަކުން 17.7 ކިލޯ ޑްރަގް ހޯދާފައިވާ ކަމަށްވެސް ފުލުހުން ބުނެއެވެ.
މީގެ އިތުރުން މި މައްސަލައާއި ގުޅުންހުރި އިތުރު ތަންތަން ވެސް ފުލުހުން ބަލައި ފާސްކުރަމުންދާ ކަމަށާއި، މި މައްސަލާގައި ހައްޔަރުކުރި 2 މީހުންގެ ބަންދާމެދު ގޮތެއް ނިންމަން ކޯޓަށް ގެންދިޔުމުން 5 ދުވަހަށް ބަންދުކުރަން އަމުރުކޮށްފައިވާކަމަށްވެސް ފުލުހުން ބުނެއެވެ.
މި އޮޕަރޭޝަނުގައި ހައްޔަރުކުރި މި ދެ މީހުންގެ ތެރެއިން ގއ. މާމެންދޫ / ފިޔާތޮށިވިލާ އަޒުހަދު ނަސީމް، 29، އަކީ މިއަހަރުގެ ފެބްރުއަރީ 21 ވަނަ ދުވަހު 3 ކިލޯއަށްވުރެ ގިނަ މަސްތުވާތަކެއްޗާ އެކު ފުލުހުން ހައްޔަރުކޮށްފައިވާ މީހެކެވެ.
