ޔޫކޭއިން ރޮހިންޔާ ރެފިއުޖީންނަށް އެހީގެ ގޮތުގައި 11 މިލިއަން ޕައުންޑު

ބަންގްލަދޭޝްގައި ގައި ހާލުގައި ދިރިއުޅެެމުންދާ ރޮހިންޔާ ރެފިއުޖީންނާއި އެހީވުމަށް އިނގިރޭސިވިލާތުން 11.6 މިލިއަން ޕައުންޑް، އިންސާނީ އެހީގެ ގޮތުގައި ދޭން ނިންމައިފި އެވެ. މި އެހީގެ ޕެކޭޖުގެ ތެރޭގައި ހިމެނެނީ 546،100 ރޮހިންޖާ ރެފިއުޖީންނަށް ކާބޯތަކެތި ފޯރުކޮށްދިނުމަށް އަށްމިލިއަން ޕައުންޑާ 46،000 ރެފިއުޖީންނަށް ފެނާއި ނަރުދަމާ ހިދުމަތަށް ފޯރުކޮށްދޭން ދެ މިލިއަން ޕައުންޑެވެ. އަދި ބަންގްލަދޭޝްގެ އެކި ކަންކޮޅުތަކުގައި ދިމާވާ ކާރިސާތަކުގެ ސަބަބުން ހާލުގައި ޖެހިފައިވާ ފަރާތްތަކަށް މިފަދަ ހާލަތެއް މެދުވެރިވެއްޖެނަމަ ކުރިއަށް އޮތް ދެ އަހަރު ދުވަހުގެ ތެރޭގައި އިންސާނީ އެހީތެރިކަން ފޯރުކޮށްދިނުމަށް 1.6 މިލިއަން ޕައުންޑް ދިނުމަށްވެސް ވަނީ ނިންމާފައެވެ. އިނގިރޭސިވިލާތުން ބަންގްލަދޭޝްއަށް ކަނޑައަޅުއްވާފައި ހުންނަވާ ސަފީރު ސާރާ ކުކް އެކަން އިއުލާންކުރެއްވީ ރޮހިންޔާ މީހުން ދިރިއުޅޭ ކޮކްސް ބާޒާރަށް ކުރެއްވި ދަތުރުފުޅުގައެވެ. އިނގިރޭސިވިލާތުން ވަނީ ރޮހިންޔާ ރެފިއުޖީން ބޭތިއްބުމަށް ބަންގްލަދޭޝްއިން ދެމުން ގެންދާ އެހީތެރިކަމަށް ތައުރީފްކޮށް، ރޮހިންޔާ މައްސަލައަށް ދާއިމީ ހައްލެއް ހޯދުމަށް ސަރުކާރަށް އެހީތެރިކަން ފޯރުކޮށްދިނުމަށް ދެމިއޮންނާނެ ކަމަށް ބުނެފައެވެ. އިނގިރޭސިވިލާތަކީ ބަންގްލަދޭޝްގައި ކާރިސާތަކަށް ތައްޔާރުވުމަށާއި އެކަމަށް އިޖާބަދިނުމުގެ މަސައްކަތަށް އަބަދުވެސް ތާއީދުކުރާ ގައުމެކެވެ. 2017 ވަނަ އަހަރުން ފެށިގެން އިނގިރޭސިވިލާތުން ވަނީ ބަންގްލަދޭޝްގައި ތިބި ރޮހިންޔާ ރެފިއުޖީންނާއި އެހެނިހެން ހާލުގައި ޖެހިފައިވާ ފަރާތަތަކަށް އިންސާނީ އެހީގެ ގޮތުގައި ޖުމްލަ 362 މިލިއަން ޕައުންޑްގެ އެހީއެއް ދީފައެވެ.