ޔޫއޭއީގައި އުމުރު ދުވަހަށް ޖަލަށްލި އިޒްރޭލު މީހަކަށް މާފުދީފި

މަސްތުވާތަކެތީގެ ކުށް ސާބިތުވެ ޔޫއޭއީގެ ޖަލަށްލާން ހުކުމް ކުރި އިޒްރޭލު އަންހެނަކު،  މާފުދީ މިނިވަން ކޮށްފިއެވެ. ފިދާ ކިވާން ނަމަކަށް ކިޔާ އަންހެން މީހާ މިނިވަންކޮށްފައިވަނީ އާދިއްތަ ދުވަހުއެވެ. އިޒްރޭލުން ބުނި ގޮތުގައި އެ އަންހެން މީހާ މިނިވަން ކޮށްފައިވަނީ އިޒްރޭލުގެ ރައީސް، އައިޒަކް ހަރްޒޯގްގެ އެދިވަޑައިގަތުމުގެ މަތިން ކަމަށެވެ. ކިވާން ހައްޔަރުކުރީ 2021 ވަނަ އަހަރުގެ އޭޕްރީލް މަހު ކެނަބިސް އާއި ކޮކެއިން ގެންގުޅުނު ކަމުގެ ތުހުމަތުގައެވެ. އޭނާއަށް އެންމެ ފުރަތަމަ އިއްވީ މަރުގެ ހުކުމެވެ. ނަމަވެސް މައްސަލަ އިސްތިއުނާފް ކުރުމުން ހުކުމްކުރީ އުމުރު ދުވަހުގެ ޖަލު ހުކުމަށެވެ. އިޒްރޭލާއި ޔޫއޭއީއާ ދެމެދު އޮންނަ ގުޅުން ގާއިމް އަލުން ބަަދަހިކުރީ 2020 ވަނަ އަހަރު އެމެރިކާގެ މެދުވެރިކަމުގެ އެއްބަސްވުމެއްގެ ދަށުންނެވެ. އަރަބި ދަރިފަސްކޮޅަށް ނިސްބަތްވާ އިޒްރޭލުގެ ފޮޓޯގްރާފަރު ކިވާން ހައްޔަރުކުރިއިރު ވަޒީފާ އަށް ދުބާއީ އަށް ގޮސް އުޅެނިކޮށެވެ. ޕްރޮސެކިއުޓަރުން ބުނި ގޮތުގައި އޭނާ އަތުން ވަނީ 50 ގްރާމް ކޮކެއިން އާއި 500 ގްރާމް ކެނަބިސް ފެނިފައެވެ. ކޮކެއިން އަކީ އޭނާގެ އެއްޗެއް ނޫން ކަމަށް ކިއާން ބުނެފައިވެއެވެ. އޭނާ މިނިވަން ކުރުމުން އިޒްރޭލުގެ ރައޫސް ހަރްޒޮގް ވަނީ ޔޫއޭއީގެ ރައީސަށް ޝުކުރު އަދާކުރައްވާފައެވެ. "އަބްރަހަމް އެކޯޑްސް" ނަމުން ނަން ދީފައިވާ، އެމެރިކާގެ މެދުވެރިކަމުގެ އެއްބަސްވުމުގެ ދަށުން އިސްރާއީލުން ވަނީ އަރަބި ބައެއް ގައުމުތަކާ އެކު ގުޅުންތައް އާންމުކޮށްފައެވެ. ޗުއްޓީ ހޭދަކުރުމަށް މަގުބޫލު މަންޒިލެއް ކަމަށްވާ ޔޫއޭއީގައި މަސްތުވާތަކެއްޗާ ދެކޮޅަށް ހަރުކަށި ސިޔާސަތެއް ގެންގުޅެއެވެ. ކުޑަ އަދަދެއްގެ މަސްތުވާތަކެތި ގެންގުޅުމުން ވެސް ބޮޑެތި އަދަދުތަކުން ޖޫރިމަނާ ނުވަތަ ޖަލު ހުކުމެއް އާދެއެވެ.