ތުރުކީ އިންތިހާބަށް 5 ދުވަހަށް ވެފަ އޮއްވާ މުސާރަތައް ބޮޑުކޮށްފި

ތުރުކީގައި ބާއްވާ އާންމު އިންތިހާބަށް ފަސް ދުވަސް ވެފައި އޮއްވާ، ސަރުކާރުގައި މަސައްކަތްކުރާ ފަރާތްތަކުގެ މުސާރަ 45 އިންސައްތަ ބޮޑުކުރައްވާނެ ކަމަށް އެ ގައުމުގެ ރައީސް އަދި އިންތިހާބުގައި ވާދަކުރައްވާ ރަޖަބް ތައްޔިބު އުރުދުގާން ވިދާޅުވެއްޖެއެވެ. އިންތިހާބުގައި އުރުދުގާން އާއި އިދިކޮޅު މައި ކެންޑިޑޭޓް ކެމަލް ކިލިކްޑަރޮގްލޫ އާ ދެމެދު ވާދަވެރިކަން ވަރަށް ބޮޑުވާނެ ކަމަށް ޕޯލްތަކުން ދައްކައެވެ. މުސާރަ ބޮޑުކުރަން ނިންމިކަން، ހާމަކުރެއްވީ އިއްޔެ އަންކާރާގައި ބޭއްވި ބައްދަލުވުމެއްގައެވެ. އެ ބޮޑުކުރުމާއެކު ސަރުކާރުގައި މަސައްކަތްކުރާ މީހުންނަށް އެންމެ ކުޑަ މުސާރައެއްގެ ގޮތުގައި މަހަކު 768 ޑޮލަރު ލިބޭނެއެވެ. އުރުދުގާން ވިދާޅުވީ ސަރުކާރުގެ މުވައްޒަފުންގެ މުސާރައާއި ޕެންޝަން ބޮޑުކުރުމުގެ މަސައްކަތް ކުރިއަށް ގެންދިއުމުގެ ވިސްނުން ގެންގުޅުއްވާ ކަމަށެވެ. އަދި ޖުލައި މަހު އިންފްލޭޝަނަށް އަންނަ ބަދަލުތަކުގެ މައްޗަށް ބިނާކޮށް ޕްލޭންތަކެއް އެބަހުރި ކަމަށް އޭނާ ވިދާޅުވިއެވެ. އަންނަ އާދީއްތަ ދުވަހު އިންތިހާބު ބާއްވާއިރު އެ ގައުމުގެ އިގްތިސާދުގެ މައްސަލަ އޮތީ ބޮޑު މައްސަލައަކަށްވެފައެވެ. މިދިޔަ އަހަރު އުރުދުގާން ނިންމެވި ބައެއް އާދަޔާ ހިލާފު ނިންމުންތަކުގެ ސަބަބުން ތުރުކީގެ ލީރާގެ އަގު ދަށަށް ގޮސް އިންފްލޭޝަން ވަރަށް މައްޗަށް ގޮސްފައިވެއެވެ. މިއީ ފާއިތުވި 24 އަހަރުގެ ތެރޭގައި އިންފްލޭޝަން އެގާ މަތިވި ފުރަތަމަ ފަހަރެވެ. ފެބްރުއަރީ މަހު އައި ބޮޑު ދެ ބިންހެލުމުގެ ސަބަބުން ތުރުކީގެ އިގްތިސާދަށް ވެސް ވަނީ ހީނަރުކަމެއް އައިސްފައެވެ. މި މައްސަލަތަކުގެ ސަބަބުން ތުރުކީގެ ވެރިއެއްގެ ގޮތުގައި 20 އަހަރު ވަންދެން ހުންނެވި އުރުދުގާން އަށް އަލުން އިންތިހާބަށް ކެމްޕެއިން ކުރަން ވަނީ ދަތިވެފައެވެ. އެ ގޮންޖެހުންތަކާއެކުވެސް އުރުދުގާން ގެންދަވަނީ އިގްތިސާދަށް އެހީވުމުގެ ގޮތުން އިންޓްރެސްޓް ރޭޓް ދަށްކުރައްވާނެ ކަމަށް ވައުދުވަމުންނެވެ. އަދި އިންފްލޭޝަން އެއް ޑިޖިޓް އިންސައްތައަކަށް ދަށްކޮށް، އިގްތިސާދު ކުރިއެރުވުމަށް އެހީތެރިވެދެއްވާނެ ކަމަށް ވައުދުވެވަޑައިގެންނެވިއެވެ.