ދެކުނުކޮރެއާގެ ފްލައިޓެއް ފޮރޮޅު ތިރިނުކޮށް ޖައްސަން އުޅުމުގެ ތެރޭގައި އަލިފާންރޯވެ 85 މީހުން މަރުވެއްޖެ

ބެންކޮކުން ފުރައިގެން ދެކުނުކޮރެއާއަށް ދަތުރުކުރި ފުލައިޓެއް ދެކުނު ކޮރެއާގެ މުއާން އިންޓަނޭޝަނަލް އެއާޕޯޓަށް ފުރޮޅު ތިރިނުކޮށް ޖައްސަން އުޅުމުގެ ތެރޭގައި އަލިފާންރޯވެ 85 މީހުން މަރުވެއްޖެއެވެ. 175 ފަސިންޖަރުންނާއި 6 ފަޅުވެރިންނާއެކު ބެންކޮކުން ފުރައިގެން އައި ޖެޖޫ އެއާގެ ފްލައިޓް 7ސީ2216 މުއާން އިންޓަނޭޝަނަލް އެއާޕޯޓުގައި ޖައްސާފައިވަނީ ހެނދުނު 9:00 ގައިއެވެ. އެގައުމުގެ މީޑިއާތަކުން އާންމުކޮށްފައިވާ ވީޑިއޯއިން ފެންނަ ގޮތުގައި ޓްވިން އިންޖީނުގެ މަތިންދާބޯޓު ރަންވޭގައި ޖެއްސިއިރު ލޭންޑިންގ ގިއަރ ފެންނާކަށްނެތެވެ. އެހެންކަމުން ރަންވޭގައި ޖެއްސުމާއެކު ބޯޓު ކަހާލައިގެން ގޮސް ފާރެއްގައި ޖެހުމުގެ ކުރިން ބޯޓުގައިވަނީ އަލިފާން ރޯވެފައެވެ.   ދެކުނު ކޮރެއާގެ ފަޔާ އެޖެންސީން ބުނީ ޖެޖޫ އެއާގެ މަތިންދާބޯޓެއް މުއާން އިންޓަނޭޝަނަލް އެއާޕޯޓަށް ޖައްސަން އުޅުމުގެ ތެރޭގައި އަލިފާން ރޯވެ 85 މީހުން މަރުވެފައިވާ ކަމަށެވެ. ބޯޓް ވެއްޓުނު ހާދިސާގައި ގިނަ ބަޔަކު މަރުވި އިރު، މިހާތަނަށް ދެ މީހަކު ސަލާމަތްވެފައިވެ އެވެ. އެއީ ކްރޫއަކާއި ޕެސެންޖަރެއެކެވެ. ބޯޓް ވެއްޓެން ދިމާވީ ލޭންޑިން ގިއަރަށް މައްސަލަތަކެއް ދިމާވެގެން ކަމަށް މިހާތަނަށް ފާހަގަކުރެވިފައިވާ އިރު، މިކަން މިހާރު އަންނަނީ އިތުރަށް ބަލަމުންނެވެ.