ސިޑްނީގެ ޝޮޕިން މޯލެއްގައި ގަތުލުއާއްމެއް ހިންގައިފި

އޮސްޓްރޭލިއާގެ ސިޑްނީގައި ހުންނަ ޝޮޕިން މޯލަކަށް ވަޅިއެއް ހިފައިގެން ހުރި މީހަކު ވަދެ، ވަޅިން ހަމަލާދީ 6 މީހަކު މަރާލައިފިއެވެ. މިކަމެއް ހިނގާފައިވަނީ މިއަދުގެ ވަގުތެއްގައި ސިޑްނީގެ ބޮންޑާއި ޖަންގޝަން ކައިރީގައި ހުންނަ އާއްމުކޮށް ވަރަށް ގިނަ މީހުން ޝޮޕިންއަށްގޮސް އުޅޭ މޯލެއްގައެވެ. އޮސްޓްރޭލިއާގެ ނައިން ނިއުސްއިން ބުނީ ،އެ ހަމަލާގައި މިހާތަނަށް 6 މީހަކު މަރުވެފައިވާކަމަށް ސިޑްނީގެ ފުލުހުން ޔަގީންކޮށްދީފައިވާކަމަށެވެ. މީގެ ތެރޭގައި ކުޑަކުއްޖަކުވެސް ހިމެނޭކަމަށް ފުލުހުން ބުންޏެވެ. ވަޅިން ހަމަލާދިން މިހާ އެކަން ކޮށްފައިވަނީ، އެއްފަހަރު ޝޮޕިން މޯލަށް ވަނުމަށްފަހު އޭގެ ކުޑައިރުކޮޅެއްފަހުން ދެވަނަ ފަހަރަށް ޝޮޕިން މޯލަށް ވަދެއެވެ. މިކަމެއް ހިނގާފައިވަނީ އޮސްޓްރޭލިއާ ގަޑިން 15:20 ހާއިރުއެވެ. ނައިން ނިއުސްއަށް މައުލޫމާތުދިން މަންޒަރުދުށް މީހަކު ބުނީ ވަޅިހިފައިގެން ހުރި މީހާ ގޮތެއްފޮތެއް ނުބަލައި މީހުންނަށް މީހުންނަށް ހަމަލާދެމުން ދިޔަކަމަށާއި، ބައެއް މީހުންނަށް ވަޅިން ހަމަލާދިނީ ނޭނގި ތިއްބާކަމަށެވެ. މި ހާދިސާގައި ވަޅިން ހަމަލާދިން މީހާ ވަނީ، އެވަގުތު އެތަނަށް އައި ފުލުސް އޮފިސަރާ ދެމެދު ހިނގާދިޔަ ކުރިމަތިލުމުގެ ތެރޭގައި މަރުވެފައެވެ. ވަޅިން ހަމަލާދިނުމުގެ ސަބަބުން 9 މަހުގެ ކުއްޖެއްގެ މަންމަ ވަނީ މަރުވެފައެވެ. އުމުރުން 35 އަހަރުގެ އެ އަންހެންމީހާ މަރުވެފައިވަނީ ތުއްތުކުއްޖާ ސަލާމަތްކުރަން އުޅުމުގެ ތެރޭގައި ހަށިގަނޑުގެ އެތައް މިތަނަށް ވަޅިހެރުމުގެ ސަބަބުން ލިބުނު ޒަހަމްތަކާ ގުޅިގެންނެވެ. މި ހަމަލާއާ ގުޅިގެން އޮސްޓްރޭލިއާގެ ބޮޑުވަޒީރު އެންތޮނީ ވިދާޅުވީ މިއަދަކީ އޮސްޓްރޭލިއާއަށް ވަރަށް ހިތާމަވެރި ދުވަހެއް ކަމަށާއި، ވަޅިން ހަމަލާ ދިން ގާތިލް އެކަންކުރީ އެއްވެސްމީހަކަށް ބެލުމެއް ނެތިކަމަށެވެ. އޭނާ ވިދާޅުވީ މި ހާދިސާގައި ހޮސްޕިޓަލުގައި 8 މީހަކަށް ފަރުވާދެވެމުންދާކަމަށެވެ. މި ހާދިސާއާ ގުޅިގެން މުޅި އޮސްޓްރޭލިއާ ހިމޭންވެފައިވާއިރު، މިއީ މި ފަހުގެ ތާރީހެއްގައި އެޤައުމުގައި ހިނގާދިޔަ އެންމެ އަނިޔާވެރި ހާދިސާއެވެ. އޮސްޓްރޭލިއާ އަކީ ވަރަށް އަމާން ގައުމެއްގެ ގޮތުގައި މީހުން ސިފަކުރާ ގައުމެކެވެ.