ނިދީގައި ގުގުރިދެމުމަކީ، ހީކުރާ ވަރަށްވުރެ ސީރިއަސް ކަމަކަށް ވެދާނެ

ނިދީގައި ގުގުރިދެމުމަކީ ނިދާފައި އޮންނަ އިރު، ނޭވާލާއިރު ބާރުއަޑެއް ހުރުމެވެ. ކޮންމެ މީހަކަށް ވެސް މިކަން ދިމާވެދާނެ އެވެ. ބައިވެރިޔާ ގުގުރިދަމާނަމަ އެއީ އަނެއް ބައިވެރިޔާ އަށް ނިދަން އުނދަގޫވާ ކަމަކަށް ވެއެވެ. ބައެއް ފަހަރު އެކަމާ ރުޅި އައިސް މައްސަލަ ވެސް ޖެހެއެވެ. އަނެއްބައި ފަހަރު ނިދީގައި މީހަކު ގުގުރިދަމާ ނަމަ އެއީ މަޖާ ޖޯކަކަށް ހަދައެވެ. ނަމަވެސް ގާތް މީހަކަށް އާދަޔާ ހިލާފަށް ގުގިރި ދެމޭނަމަ އެއީ ބޮޑު ކަމެއްގެ އަލާމާތަކަށް ވުން އެކަށީގެން ވާކަން ވެސް ދަންނާށެވެ. ގުގުރި ދެމެން މެދުވެރިވާ ބައެެއް ސަބަބު:

• ނޭފަތްބެދުން: ބައެއް މީހުނަށް ސައިނަސްގެ އުނދަގޫވާ ދުވަސްވަރު ގުގުރިދެމެއެވެ. އަދި ނޭފަތުގެ ކަށިގަނޑު ލެނބިފައި ހުންނަ ނަމަވެސް ގުގުރި ދެމޭނެއެވެ.
• ދުލާއި ކަރުގެ މަސްތަކުގެ ބާރުދަށްވުން: ނިދާފައި އޮންނަ ގަޑީގައި ދުލާއި ކަރުތެރޭގެ މަސްތަކުގެ ބާރުދަށްވެ ނޭވާލުމަށް ވައިދައުރުވާ މަގަށް ފެތުރޭނަމަވެސް ގުގުރިދެމޭނެއެވެ.
• ކަރުގައި މަސްޖެހުން: ބަރުދަން އިތުރުވުމުގެ ސަބަބުން ކަރުގައި މަސްޖަހާފައި ހުންނަ ނަމަ ގުގުރި ދެމޭނެއެވެ. އަދި ބައެއް ކުޑަކުދިންގެ ޓޮންސިލް އަދި އެޑެނޮއިޑް ބޮޑުވުމުގެ ސަބަބުންވެސް ގުގުރި ދެމޭނެއެވެ.
• ކުޑަދޫ ދިގުވުން: ކުޑަދޫ ދިގުނަމަވެސް ނޭވާލުމަށް ކަރުގައި އޮންނަ ޖާގަ ހަނިކުރާނެއެވެ. އަދި ކުޑަދޫ ދެކަފިވެފައި ހުންނަ ނަމަ ނޭވާލުމުގައި ދެބައި ވައިބްރޭޓްވުމުގެ ސަބަބުން ވެސް ކަރުތެރެ ބެދެން ދިމާވެއެވެ.
• ބަނގުރަލާއި މަސްތުވާތެކތި ބޭނުން ކުރުން: ބަނގުރާ ބޭނުން ކުރުމާއި، މަސްތައް ހަމަ ޖައްސާލުމަށް ބޭނުން ކުރެވޭ ތަކެތީގެ ސަބަބުން ކަރާއި ދުލުގެ މަސްތައް މާބޮޑަށް މަޑުވެ އޭގެ ބާރު ކެނޑުމުން ވެސް ގުގުރި ދެމޭނެއެވެ.
• ނިދަން އޮންނަ ގޮތުން: އުއްޑުން ނިދަން އޮންނަ ނަމަ ގުގުރި ދެމުން އިތުރުވާނެއެވެ. ނަމަވެސް މާހަރު ނޫން ބާލީހެއް ބޭނުންކޮށްގެން ބޯ ކުޑަކޮށް އުފުލިފައި އެއް ފަރާތަށް އޮންނަ ނަމަ މިކަމަށް ލުއި ލިބޭނެއެވެ.
• ހަމަ ނިދިނުލިބުން: ރޭގަނޑުގެ ނިދި ރަގަޅަށް ނުލިބޭ ނަމަވެސް ކަރާއި އަނގައާއި ގުޅިފައި ހުންނަ މަސްތައް މާބޮޑަށް ރިލެކްސް ވުމުގެ ސަބަބުން މި ކަން މެދުވެރިވެދާނެއެވެ.

ގުގުރިދެމުން ނުރައްކާ ވަނީ ކިހިނެއް ؟ ގުގުރި ދެމުމަކީ އެ އަޑު އިވުމުން އަނެއް މީހާއަށް ވާ އުނދަގުލުގެ އިތުރުން ސީރިއަސް ސިއްހީ މައްސަލަ އަކަށް ވެދާނެއެވެ. އަދި ނިދީގައި މަރުވަން ދިމާވާ ސަބަބަކަށް ވެސް ވެއެވެ. ރިސާޗްތަކުން ދައްކާ ގޮތުގައި ގުގުރި ދެމުމަކީ އިނގިރޭސިވިލާތުގެ 10 މިލިއަން މީހުންނަށް އޭގެ އަސަރުކޮށްފައިވާ "ސައިލެންޓް ކިލާ" ނުވަތަ ނިދީގައި މަރުވާ މަރުވުމުގެ ގެ އަސްލު ކަމަށް ވާ ސަބަބު ތަކުގެ ތެރެއިން ކަމެއްކަަމަށް ދަ މިރާއިން ރިޕޯޓްކޮށްފައި ވެއެވެ.  މާ ބޮޑަށް ގުގުރު ދެމޭނަމަ، ސްޓްރޯކާއި ހާޓް އެޓޭކް ޖެހުމުގެ ނުރައްކާ ބޮޑުވެދާނެ ކަމަށާއި، ސްލީޕް އެޕްނިއާ ކުރިމަތިވެދާނެ ކަމަށް މާހިރުން ބުނެއެވެ.  ސަބަބަކީ، ދިގުކޮށް އަދި އަޑުބާރުކޮށް ގުގުރި ދެމޭނަމަ ސިކުނޑިއަށް ލޭފޮނުވާ ނާރުތައް ހަނިވުމުގެ މައްސަލަ ދިމާވެއެވެ. އަދި މިކަމުގެ ސަބަބުން ސްޓްރޯކް ޖެހުމުގެ ފުރުސަތު އޮވެއެވެ. މިއީ ވަރަށް ނުރައްކާތެރި ކަމެކެވެ. ނިދީގައި ސްޓްރޯކެއް ޖެހި، ކައިރީގައި އެހެން މީހަކު ނެތްނަމަ ހިތާމަވެރި ހާދިސާއެއް ހިނގުން ގާތެވެ. ގުގުރި ދެމުމާއި ސްލީޕް އެޕްނިޔާއަކީ ހިތުގެ މައްސަލަތަކާއި ގުޅުން ހުރި ކަންކަމެވެ. މީގެތެރޭގައި ލޭގެ ޕްރެޝަރު މަތިވުމާއި، ހިތުގައި ހުންނަ ލޭފޮނުވާދޭ ނާރުތައް ބެދުން ހިމެނެއެވެ. މިއީ ހިތް ހުއްޓުމަށް ދިމާވާ އެންމެ އާންމު ސަބަބުތަކެވެ. ގުގުރި ދެމުމުގެ ސަބަބުން ހިތުގެ ވިންދުގެ ތަރުތީބު ގެއްލެން ދިމާވާނެއެވެ. ދިގު މުއްދަތަށް ގުގުރި ދެމުމުގެ މައްސަލަ ހުންނަ މީހުންގެ ހިތުގެ މަތީބަޔާއި ތިރީގައި އެއްވަރަކަށް ވިންދު ނުޖަހާނެއެވެ. ގުގުރި ދެމުން ހައްލު ކުރާނީ ކިހިނެއް ؟ ލައިފް ސްޓައިލް ބަދަލު ކުރުން : ގުގުރި ދެމުގެ ސަބަބު ތައް ކަމަށްވާ، ބަރުދަން ލުއިކޮށް، ދުންފަތުގެ އިސްތިއުމާލުކުރުން އަދި މަސްތުވާތަކެތި ބޭނުންކުރުން ހުއްޓާލުމަށް ޑޮކްޓަރު މަޝްވަރާދޭނެއެވެ. ހާއްސަ ޑިވައިސް އެއް ބޭނުންކުރުން: އަނގައިން އަދި ނޭފަތުން ވައި ދައުރުކުރުމަށް އޮންނަ ޖާގަ ބެދުނަ ނުދިނުމަށް، ޕްލާސްޓިކުން ހަދާފައި ހުންނަ އެކަމަށް ހާއްސަ ކުޑަ އާލާތެއް ބޭނުން ކުރުމުންވެސް މިކަމަށް ހައްލު ލިބެއެވެ. އޮޕަރޭޝަން: ކަރުތެރޭގައި ކުރުގެޅިފައިވާ ބައެއް ޓީޝޫތައް ނެގުމަށް ހާއްސަ އޮޕަރޭޝަނެއް ކޮށްގެންވެސް މިކަމަށް ހައްލު ހޯދެއެވެ. މެޝިނެއްގެ އެހީ: ގުގުރި ދެމުމުގެ އުނދަގޫ ވަރަށް ބޮޑުވާ މީހުން ނިދާއިރު ބޭނުންކުރުމަށް ހާއްސަ މެޝިންވެސް ހުރެއެވެ. މީގެ އިތުރުން ވެސް ގަވާއިދުން ވަކި ގަޑިއެއްގައި ނިދުމާއި ހޭލުން އާދަކުރުމުން ވެސް ނިދީގައި ދިމާވާ އުނދަގޫތައް ލުއިވެއެވެ. ގުގުރި ދެމުމަކީ، އޭގެ ސަބަބުން ނޭވާ ހުއްޓުމަށް މަގިފައިވެދާނެ ކަމަަކަށް ވާތީ، ސީރިއަސް ކޮށް ނަގަންޖެހޭ ކަމެކެވެ.