މެލޭޝިއާގައި ފެންބޮޑުވެ ހަތަރު މީހަކު މަރުވެއްޖެ

މެލޭޝިއާގެ ދެކުނުގެ ޖޯހޯރު ސްޓޭޓުން ފާއިތުވި ހަފުތާއެއްހާ ދުވަހުގެ ތެރޭގައި ވެހުނު ވާރޭގައި ހަތަރު މީހުން މަރުވެ، 40،000 އަށް ވުރެ ގިނަ މީހުން ރައްކާތެރި ހިސާބުތަކަށް ގެންގޮސްފިއެވެ. ނޭޝަނަލް ޑިޒާސްޓާ މެނޭޖްމަންޓް އެޖެންސީން ބުނީ ގެދޮރު ގެއްލުނު މީހުންނަށް 200 އަށް ވުރެ ގިނަ ވަގުތީ ބޯހިޔާވަހިކަން ލިބޭނެ ތަންތަން ގާއިމްކޮށްފައިވާ ކަމަށެވެ. އަދި ބުދަ ދުވަހުން ފެށިގެން މިހާތަނަށް ހަތަރު މީހަކު މަރުވެފައިވާ ކަމަށާއި އޭގެ ތެރޭގައި ވެހިކަލެއްގައި ތާށިވެފައި ހުރި މީހަކު ފެންބޮޑުވުމުގެ ސަބަބުން ގެނބިގެން މަރުވި ހާދިސާއެއް ވެސް ހިމެނޭ ކަމަށް އެ ގައުމުގެ ފުލުހުން ވަނީ ބުނެފައެވެ. އޮކްޓޯބަރު މަހުން ފެށިގެން މާޗް މަހާ ދެމެދު މެލޭޝިއާގައި މޫސުން ވަރަށް ބޮޑަށް ގޯސްވެއެވެ. "އަޅުގަނޑުމެން އަބަދުވެސް ތައްޔާރުވަމުން އައީ ނޮވެމްބަރު އަދި ޑިސެމްބަރު މަހު ވިއްސާރަ މޫސުމަށް. ކޮންމެ ގޭބިސީއެއްގައި ވެސް ބޯޓެއް އޮތް ނަމަވެސް މިހާރު އަންދާޒާ ނުކުރެވޭ ފަދަ މޫސުމަކާ އެކު ހީވަނީ އަހަރެމެން ތައްޔާރު ނުވެ ހަލަބޮލިވެފައިވާ ހެން،" ޔޮންގް ޕެންގް ނަމަކަށް ކިޔާ ޖޯހޯރު ޓައުނުގައި ދިރިއުޅޭ އުމުރުން 57 އަހަރުގެ ނޫރް ސާދު ރޮއިޓާސް އަށް ކިޔައިދިނެވެ. މެލޭޝިއާގެ މޫސުމާ ބެހޭ އިދާރާއިން ވަނީ އޭޕްރީލް މަހާ ހަމައަށް މޫސުން ގޯސްވާނެ ކަމަށް ލަފާކޮށްފައެވެ. އެއީ ބޯކޮށް ވާރޭ ވެހުމުގެ ސަބަބުން މީހުން ސަލާމަތް ކުރުމުގެ މަސައްކަތަށް ވެސް ހުރަސް އެޅިފައިވާ ދަނޑިވަޅެއްގައެވެ. މިދިޔަ އާދީއްތަ ދުވަހު މެލޭޝިއާގެ ބޮޑުވަޒީރު އަންވަރު އިބްރާހިމް ވަނީ ޖޯހޯރުގައި ޒިޔާރަތްކުރައްވާފައެވެ. އެއަށް ފަހު ކުރެއްވި ޓްވިޓާގައި ވިދާޅުވެފައި ވަނީ "ފެންބޮޑުވުމުގެ މައްސަލައިން އަރައިގަތުމަށް ސަރުކާރުން ކުރިއަށް ގެންދާ މިޓިގޭޝަން ޕްރޮޖެކްޓްތައް އަވަސް ކުރާނެ" ކަމަށެވެ. އަދި ފެންބޮޑުވުމުގެ ސަބަބުން ހާލުގައި ޖެހިފައިވާ ފަރާތްތަކަށް އުފުލަންޖެހޭ ބުރަ ކުޑަކުރުމަށް ފެޑެރަލް އަދި ސްޓޭޓް ސަރުކާރުތަކުން ވެސް ވަގުތުން އެހީތެރިކަން ފޯރުކޮށްދީފައިވާ ކަމަށް އޭނާ ވިދާޅުވިއެވެ.