ޗައިނާއިން އީ.ޔޫ ގައުމުތަކަށް އެތެރެކުރާ އިލެކްޓްރިލް ވެހިކަލްތަކަށް ޓެރިފް ބޮޑުކުރުމުން އީ.ޔޫ.އާ ދެކޮޅަށް އިލެކްޓްރިކް ކާރު އުފައްދާ މަޝްއޫރު ކުންފުނި ޓެސްލާއިން ކޯޓަށް މައްސަލަ ހުށަހަޅައިފިއެވެ.
ޔޫރަޕިއަން ކޯޓް އޮފް ޖަސްޓިސް އިން ވަނީ ޓެސްލާގެ ޝަންގހައި ސަބްސިޑިއަރީ އިން އީ.ޔޫ އާ ދެކޮޅަށް ދަޢުވާއެއް ވައްދާފައިވާކަން މިއަދު ކަށަވަރުކޮށްދީފައެވެ.
މާލީ ދިރާސާތައް ކުރާ ފަރާތްތަކުން ބުނެފައިވާ ގޮތުގައި މި ދައުވާއަކީ ޖަރުމަނުގެ ބީ.އެމް.ޑަބްލިއު. އަދި ގިނަ ޗައިނާ ކުންފުނިތަކުން އީ.ޔޫ އަށް ދެކޮޅަށް މީގެ ކުރިން ކޮށްފައިވާ ދައުވާތަކާ އެއްގޮތް ދަޢުވާއެއް ކަމަށެވެ.
މިދިޔަ އޮކްޓޯބަރު މަހުން ފެށީގެން އީ.ޔޫ އިންވަނީ އެންޓި-ސަބްސިޑީ ޓެރިފްގެ ގޮތުގައި އިލެކްޓްރިކް ވެހިކަލް އީ.ޔޫ އަށް އެތެރެކުރުމަށް ޓެސްލާއަށް 7.8 އިންސައްތައިގެ ޓެރިފް އެއް އަދި ޗައިނާގެ އެހެން ބައެއް ކުންފުނިތަކަށް 35.3 އިންސައްތައިގެ ޓެރިފް އެއް ދައްކަންޖެހޭ ގޮތަށް ކަނޑައަޅާފައެވެ.
އީ.ޔޫ އިން މި ނިންމުން ނިންމާފައިވަނީ 2023 ވަނަ އަހަރު ކުރި ތަހުޤީގަކަށްފަހު ޗައިނާ އިން އެގައުމުގެ އިލެކްޓްރި ވެހިކަލް އުފައްދާ އިންޑަސްޓްރީއަށް ނާޖާއިޒް ފައިދާތަކެއް ފޯރުކޮށްދޭކަމާއި އެ ގޮތުން އެފަރާތްތަކަށް ސޮފްޓް ލޯންތައް ހަމަޖައްސަ ދިނުމާއި، އަގުހެޔޮކޮށް ބިންތައް ދޫކުރާކަމާއި ސަޕްލަޔަރުންނަށް ސްބްސިޑީ ފޯރުކޮށްދޭކަމަށް އެ ތަހުޤީގުން އެނގިފައިވާކަމަށް އީ.ޔޫ.އިން ބުނެއެވެ.
މިދަޔަ އަހަރު އީ.ޔޫ ގައުމުތަކުގައި ވިއްކާފައިވާ އިލެކްޓްރިކް ކާރުގެ ތެރެއިން ފަސްބައިކުޅަ އެއްބައި ނުވަތަ 300،000 ކާރަކީ ޗައިނާގައި އުފައްދާފައިވާ ކާރެވެ. އަދި މީގެ ތެރެއިން 28 އިންސައްތައަކީ ޓެސްލާއިން އުފައްދާފައިވާ ކާރެވެ.
