ކާރު އެކްސިޑެންޓެއްގައި ފަލަސްތީނުގެ ވަޒީރަކު ނިޔާވެއްޖެ

ހުޅަނގު އައްސޭރީގައި ހިނގި ކާރު އެކްސިޑެންޓެއްގައި ފަލަސްތީނު ވަޒީރަކު ނިޔާވެއްޖެއެވެ. ފަލަސްތީނުގެ ރަސްމީ ނޫސް އެޖެންސީ ވަފާއިން ރިޕޯޓްކޮށްފައިވާ ގޮތުގައި މިނިސްޓާ އޮފް ޑިޓެއިނިންސް އެންޑް އެކްސް-ޑިޓެއިނިންސް އެފެއާޒް ގަދްރީ އަބޫ ބަކުރު އަވަހާރަވީ ހޮނިހިރު ދުވަހު ހުޅަނގު އައްސޭރީގެ ނަބްލުސްގައި ހިނގި ކާރު އެކްސިޑެންޓެއްގައެވެ. ފަލަސްތީނު ރައީސް މަހްމޫދު އައްބާސް ނެރުއްވި ބަޔާނެއްގައި ވަނީ ގްދްރީ އަބޫ ބަކަރު އަވަހާރަވުމާ ގުޅިގެން ހިތާމަ ކުރައްވާ ކަމަށް ވިދާޅުވެފައެވެ. އަބޫބަކުރަކީ ފަލަސްތީނާއި ފަލަސްތީނުގެ ރައްޔިތުންގެ ދިފާއުގައި މުޅި އުމުރު ހޭދަކުރެއްވި ހަރުދަނާ އަދި  މިނިވަންކަން ހޯދުމަށް ހަނގުރާމަވެރިއެއްގެ ގޮތުގައި އައްބާސް ވަނީ ސިފަކުރައްވާފައެވެ. އައްބާސް ވިދާޅުވީ އަބޫ ބަކަރަކީ ފަލަސްތީނުގެ ގައުމީ ހަރަކާތުގައި އެންމެ ކުރީ ސަފުގައި ހަރަކާތްތެރިވެ ވަޑައިގެން ގައުމާއި ގައުމުގެ ތެރެއިންނާއި ބައިނަލްއަގުވާމީ މައިދާނުގައި ވެސް އޭނާގެ ގައުމާއި ރައްޔިތުންގެ ހައްގުތަކާއި މަސްލަހަތުތައް ކެނޑިނޭޅި ދިފާއު ކުރައްވަމުން ގެންދަވާ ބޭފުޅެއް ކަމަށެވެ. ހެލްތު މިނިސްޓަރު މައި އަލް ކައިލާ ވެސް ވަނީ އަބޫބަކަރަކީ މިނިވަންކަމުގެ ހިތްވަރުގަދަ ހަނގުރާމަވެރިއެއްގެ ގޮތުގައި ސިފަކުރައްވައި، އޭނާ އަށް ތައުރީފު ކުރައްވައިފައެވެ. ހެލްތް މިނިސްޓަރު މައި އަލް ކައިލާ ވަނީ އަބޫބަކުރަކީ ހިތްވަރުގަދަ މިނިވަންކަމުގެ ހަނގުރާމަވެރިއެއްގެ ގޮތުގައި ސިފަކުރައްވާފައެވެ. އެކަމަނާ ވަނީ އިސްރާއީލުގެ ޖަލުތަކުގައި ބަންދުކޮށްފައި ތިބި ފަލަސްތީނުގެ ސިޔާސީ ގައިދީންގެ މައްސަލައަށް އަބޫބަކުރު ކެނޑިނޭޅި ކުރެއްވި މަސައްކަތް ފާހަގަކުރައްވާފައެވެ.