ހައުސިންގ މިނިސްޓްރީގައި ރޯކޮށްލީ ރައީސް މުއިއްޒު އާއި ގާތް މީހަކު ކަން ފުލުހުންނަށް އެނގޭނެ ކަމަށް ރައީސް ޔާމީން ވިދާޅުވި މައްސަލަ ބަލަން ފުލުހުންނަށާއި ނެޝަނަލް އިންޓެގްރިޓީ ކޮމިޝަނަށް ހޯމް މިނިސްޓަރ އަލީ އިހުސާނު އަންގައިފި އެވެ.
ހޯމް މިނިސްޓަރ އަލީ އިހުސާނު އެކްސް ގައި ކުރެއްވި ޕޯސްޓްގައި ވިދާޅުވީ ސަރުކާރުގެ 3 ވުޒާރާއެއް ހިންގަމުންދިޔަ އިމާރާތްތައް އަންދައިގެން ގޮސްފައިވާ މައްސަލައާ ގުޅިގެން ދިވެހި ފުލުހުންނާއި އެކުވެރި ޤައުމުތަކުގެ މިފަދަ ކަންކަން ތަހުޤީގުކުރާ މާހިރުން ގުޅިގެން ކުރި ތަހުގީގުން ހޯދިފައިވަނީ އެ ހާދިސާ ހިނގާފައިވަނީ ކަރަންޓު ނަރުތަކުގައި ރޯވެގެންކަމަށެވެ.
އަދި އެއްވެސް މީހަކަށް މިމައްސަލާގައި ޖިނާއީ ތުހުމަތެއް ކުރާނެ އެއްވެސް ހެއްކެއް ތަހުގީގަށް ލިބިފައިނުވާކަމަށް ފުލުހުންވަނީ އެމަނިކުފާނަށް މައުލޫމާތު ދެއްވާފައިވާ ކަމަށެވެ.
ނަމަވެސް 5 ސެޕްޓެމްބަރ 2026 ގައި ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމު ދައްކަވާފައިވާ ވާހަކަފުޅުގައި އެ އިމާރާތްތަކުގައި އަލިފާން ރޯކޮށްލާފައިވާ ކަމަށާއި އެކަން ކުރި މީހާވެސް ފުލުހުންނަށް އެނގޭކަމަށް މުތުލަގުކޮށް ވިދާޅުވެފައިވާ ކަމަށާއި، އެހެންކަމުން މިމައްސަލާގައި އެމަނިކުފާނަށް އެނގިވަޑައިގަންނަވާ މަޢުލޫމާތު ސާފުކުރައްވައި، ތަހުޤީގުގައި އިތުރަށް ބައްލަވަންޖެހޭ ކަމެއްހުރިނަމަ އެކަން ބެއްލެވުމަށް ދިވެހި ފުލުހުންގެ ޚިދުމަތަށް އެމަނިކުފާނު އަންގާފައިވާ ކަމަށްވެސް އެ ޕޯސްޓްގައި ވިދާޅުވެފައި ވެއެވެ.
އަދި ހަމަ އެއާއެކު ދިވެހި ފުލުހުންގެ މައްޗަށް ކުރީގެ ރައީސުލްޖުމްހޫރިއްޔާ ކުރެއްވި ތުހުމަތު ތަހުޤީގުކޮށް ދެއްވުމަށްއެދި ނޭޝަނަލް އިންޓެގްރިޓީ ކޮމިޝަނަށްވެސް އެމަނިކުފާނު ދަންނަވާފައިވާ ކަމަށްވެސް އެ ޕޯސްޓްގައި ބުނެފައި ވެއެވެ.
